नेपाली कांग्रेसका महामन्त्री एवं सांसद गगनकुमार थापाले सरकारले विश्वविद्यालय व्यवस्थापन गर्न नसकेको आरोप लगाएका छन् । विश्वविद्यालयहरूलाई व्यवस्थापन गर्ने सन्दर्भमा सरकार ‘उल्टो बाटो’मा रहेको उनको आरोप छ । मंगलवार प्रतिनिधि सभाको बैठकमा बोल्दै उनले सरकारले विश्वविद्यालय व्यवस्थापनको सन्दर्भमा संवैधानिक प्रावधान पालना नगरेको बताए । 

संविधानको अनुसूची ५ ले केन्द्रीय विश्वविद्यालयलाई संघले हेर्ने र अनुसूची ६ ले प्रादेशिक विश्वविद्यालयलाई प्रदेशले हेर्ने भनेपनि त्यसअनुसार काम हुन नसकेको उनको भनाइ थियो । सांसद थापाले शिक्षासम्बन्धी एउटा राष्ट्रिय नीति, त्यसअन्तर्गत संघीय शिक्षा ऐन, त्यससँग जोडेर विश्वविद्यालयको छाता ऐन र छाता ऐनले विश्वविद्यालयको व्यवस्थापन कसरी गर्ने भन्ने स्पष्ट व्यवस्था गर्नुपर्ने सुझाव दिए । 

सांसद थापाले सरकारले संघीय शिक्षा ऐन र शिक्षा नीति बनाएर प्रस्तुत गर्न नसकेको भन्दै असन्तुष्टि व्यक्त गरे । संघीय शिक्षा ऐन र विश्वविद्यालयको छाता ऐन बनाउन नसक्दा विश्वविद्यालयहरू ध्वस्त भइरहेको उनकाे भनाइ थियाे ।