नेकपा माओवादी केन्द्रका सांसद गजेन्द्र महतले बहुचर्चित एम अधिकारी भन्ने व्यक्तिबारे आफूले प्रमाण फेला पारेको टिप्पणी गरेका छन् । शुक्रवार बसेको प्रतिनिधि सभा बैठकमा ठट्यौली पारामा सांसद महतले एम अधिकारी भनेको गभर्नर नै भएको बताएका हुन् । 

‘सीसीटीभी मात्र होइन एम अधिकारी पनि खोज्न माग गरेको थिएँ, सरकारले खोजबिन नगरे पनि मैले प्रमाण फेला पारेको छु’ महतले भने, ‘एम भनेको मनी अर्थात् पैसा र अधिकारी भनेको अधिकार भएको मान्छे । अर्थात् ढुकुटीमा अधिकार भएको मान्छे या गभर्नर पैसा भएको मान्छे । एम अधिकारी खोज्न समिति बनेन, मैले एक्लै एम अधिकारी भन्ने मान्छे खोजेर बुझाएको छु । उहाँमाथि कार्वाही होस सभामुख महोदय’ महतले भने । 

जुम्लाका सांसद महतले एम अधिकारीको विषयमा निरन्तर कुरा उठाउँदै आएका छन् । नेकपा एमालेको अर्थ तथा योजना विभागको सदस्य रहेका एम अधिकारीको विषयलाई लिएर कुरा उठ्दै आएको छ ।