नेपाल विद्युत् प्राधिकरणका कार्यकारी निर्देशक कुलमान घिसिङले केही समयपछि निजी क्षेत्रलाई विद्युत् व्यापार गर्न दिन नसकिने बताएका छन् । आइतवार नेपाल आर्थिक पत्रकार समाज (सेजन) ले आयोजना गरेको कार्यशालामा बोल्दै उनले २० वर्षपछि निजी क्षेत्रलाई विद्युत्को व्यापार गर्न दिन नसकिने बताएका हुन् । उनले विद्युत् प्राधिकरणले ट्रान्समिशन प्रशारण लाइनको जोखिम तथा शुल्क तिर्ने तर निजी क्षेत्रले व्यापार गर्ने कुरा हुन नसक्ने स्पष्ट पारे । 

कार्यकारी निर्देशक घिसिङले प्रसारण लाइनमा वन तथा अन्य विविध कारणले प्रशारण शुल्क बढाउँदै जान नहुने बताए । उनले पछिल्लो समय ट्रान्समिशन प्रसारणमा शुल्क उच्च हुँदै गएको गुनासो गर्दै प्रशारण लाइनको लागत कम गर्नुपर्ने बताए । उनले भारतमा राम्रो मूल्य पाएकाले यो वर्ष प्राधिकरणले करिव १६ अर्ब रुपैयाँ विद्युत् निर्यातबाट कमाउने बताए । गत वर्ष प्राधिकरणले ५ अर्बको विद्युत् निर्यात गरेको थियो ।

कार्यकारी निर्देशक घिसिङले सिमेन्ट उद्योगमा ६५ प्रतिशत विद्युत् क्षमता दिन नसकेको विषय गलत भएको बताए । उनले अहिले सबै उद्योगमा शतप्रतिशत क्षमतामा विद्युत् दिएको दाबी गरे । उनले प्राधिकरण उद्योगलाई मागेजति विद्युत् दिन तयार रहेको भन्दै अहिले ट्रान्समिसन र सव–इस्टेसनमा लगानी बढाएको बताए । 

कार्यकारी निर्देशक घिसिङले विद्युतीयलाई प्रोत्साहन गर्नुपर्ने बताए । उनले विद्युतीय सवारीमा प्रतिकिलोमिटरमा एक रुपैयाँ पनि नपर्ने भन्दै अहिले पेट्रोल डिजेलमा २० रुपैयाँ सवारी भाडा रहेको बताए ।