बागमती प्रदेशका मुख्यमन्त्री राजेन्द्रप्रसाद पाण्डेले अघिल्लोे सरकारको पालामा कृषि क्षेत्रमा चरम भ्रष्टाचार भएको आरोप लगाएका छन् । खाद्य अधिकार तथा खाद्य सम्प्रभूता सम्बन्धी ऐन कार्यान्वयन गर्न भएको अन्तरसंवाद कार्यक्रमलाई सम्बोधन गर्दै उनले अघिल्लो सरकारको पालामा ३० लाख रुपैयाँ बजेट विनियोजन गर्दा गर्दा १० लाख मन्त्रीको टेबलमा, १० लाख व्यवस्थापन (बिचौलिया)लाई र मात्र १० लाख किसानलाई दिने गरेको आक्षेप लगाएका हुन् । 

यस्तै, उनले प्रदेश सरकारले चाँडै रासायनिक मल उद्योग खोल्ने तयारी गरेको जानकारी दिएका छन् । मुख्यमन्त्री पाण्डेले भने, ‘प्रदेशलाई प्याज र लसुनमा आत्मनिर्भर बनाउँने योजना पनि छ ।’ प्रदेश सरकारले किसानलाई प्याज र लसुनमा प्रतिकिलो एक रुपैयाँ अनुदान दिने र आवश्यक परे बढाउँदै जाने उनले जानकारी दिए । प्रदेश विज्ञान प्रविधि विश्वविद्यालय स्थापना गर्न बजेट विनियोजन गरिसकेको भन्दै मुख्यमन्त्री पाण्डेले प्रदेश सरकारले १० हजार युवालाई क्लोज क्याम्पमा राखेर दक्ष जनशक्ति उत्पादन गर्ने बताए ।

प्रदेशका आन्तरिक मामिला तथा कानूनमन्त्री कृष्णप्रसाद शर्मा खनालले कृषि तथा पशुपन्छी क्षेत्रको विकासका लागि व्यवहारिक कानून तर्जुमा गर्न आफूहरूले महत्वपूर्ण भूमिका खेल्ने बताए । कार्यक्रम फियान नेपालको आयोजना तथा बागमती प्रदेशको कृषि तथा पशुपन्छी विकास मन्त्रालयसँगको समन्वयमा भएको थियो ।