नेकपा एमालेका अध्यक्ष केपी शर्मा ओलीले देश कहाँ पुग्ने हो भनेर जनता त्रसित रहेको बताएका छन् । सरकार सञ्चालनको शैलीका कारण जनता दिक्दार रहेको उनले दाबी गरे । बिहीवार नेकपा एसका दुई पूर्वप्रदेश सदस्यलाई पार्टी प्रवेश गराउँदै ओलीले देशलाई अगाडि बढाउन एमालेको सरकार जरुरी रहेको बताएका हुन् ।

‘देशको जस्तो हालत छ, जनता दिक्क छन्, त्रसित छन् । यो देश कहाँ पुग्ने हो ? एउटा भयावह स्थिति छ । यस्तो स्थितिमा मंसिर ४ गते संघ र प्रदेशमा चुनाव हुँदैछ’, बालकोटमा आयोजित पार्टी प्रवेश कार्यक्रममा ओलीले भने, ‘देश बनाउने कुरामा शक्ति सन्तुलनको अवस्थालाई जनता र विकासको पक्षमा पार्न र राष्ट्रियताको पक्षमा अडान लिन, विकासको गतिलाई अगाडि बढाउन नेकपा एमाले बाहेकले अरूले सक्दैन । मंसिर ४ को चुनाव पछि एमालेको सरकार चाहिन्छ ।’

ओलीले फेरि एकपटक देश एमालेमय बन्दै गएको दाबी गरे । ‘देश एमालेमय बन्दै गएको छ, प्रवेशको लहर बढ्दै गएको छ । हामी हरेक दिन पार्टी प्रवेशका ठूला कार्यक्रम सञ्चालन गरिरहेका छौँ’, ओलीले भने । गठबन्धनबाट तर्सिएकाहरू एमाले प्रवेश गरिरहेको उनले दाबी गरे ।