प्रधानमन्त्री शेरबहादुर देउवाले जसपाबाट सरकारमा सहभागी मन्त्रीहरूको जिम्मेवारी खोस्ने तयारी गरेका छन् । नेकपा एमालेसँग चुनावी गठबन्धन गरेको जसपाका मन्त्रीहरूलाई जिम्मेवारीबिहीन बनाउन लागिएको कांग्रेस उच्च स्रोतले जानकारी दियो ।

सत्ता गठबन्धनमा छलफल गरेर जसपा मन्त्रीहरूको जिम्मेवारी खोस्ने तयारी गरेका हुन् । यसबारे छलफल गर्न सत्ता गठबन्धनको बैठक मंगलवार बालुवाटारमा बस्दैछ ।

देउवा सरकारमा जसपाका चार मन्त्री छन् । संघीय मामिला तथा स्थानीय विकासमन्त्री राजेन्द्र श्रेष्ठ, शहरी विकासमन्त्री मोहमद इस्तियाक राई, वनमन्त्री प्रदीप यादव र कृषिमन्त्री मृगेन्द्र सिंह यादवको जिम्मेवारी खोस्ने तयारी गरिएको हो । 

निर्वाचन आचारसंहिताका कारण मन्त्रिमण्डल विस्तार गर्न नमिल्ने र मन्त्रीलाई बर्खास्त गर्न नमिल्ने भएका कारण उनीहरूको जिम्मेवारी खोस्ने तयारी भएको कांग्रेस स्रोतले बतायो । 

२०७४ सालमा माओवादीले एमालेसँग चुनावी तालमेलको निर्णय गरेपछि त्यो बेला पनि माओवादीका मन्त्रीहरूलाई जिम्मेवारीबिहीन बनाइएको थियो । मन्त्रीहरूले राजीनामा नगर्दासम्म बखास्त गर्न नमिल्ने भएकोले जिम्मेवारी खोस्न लागिएको स्रोतले बतायो ।

‘आचारसंहिताका कारण मन्त्रिपरिषद् पुनर्गठनको सम्भावना नरहेकोले विगतमा जस्तै मन्त्रीहरूको जिम्मेवारी खोस्न लागिएको हो’ स्रोतले लोकान्तरसँग भन्यो । २०७४ सालमा माओवादी मन्त्रीको जिम्मेवारी खोसिएपछि विनाविभागीय हैसियतमा मन्त्रीहरू झण्डा हल्लाउँदै चुनाव प्रचारमा गएका थिए । 

गठबन्धनको बैठकमा मंसिर ४ गतेको प्रतिनिधि सभा र प्रदेश सभा निर्वाचनका लागि गठबन्धनमा भएको सहमतिबेगर गरिएका बागी उम्मेदवारीलाई मान्यता नदिनेबारे निर्णय हुने माओवादीका एक नेताले जानकारी दिए । आइतवार भएको मनोनयनमा कतिपय स्थानमा गठबन्धनबाटै बागी उम्मेदवारी परेको छ ।