हास्य कलाकार कुमार कट्टेल ‘जिग्री’ले झापा क्षेत्र नम्बर ५ बाट प्रतिनिधि सभा सदस्य निर्वाचनमा स्वतन्त्र उम्मेदवारी दिने भन्ने कुरा हल्लामै सीमित भएको छ । उनी नेकपा एमालेका अध्यक्ष केपी शर्मा ओलीको निर्वाचन क्षेत्रसमेत रहेको झापा ५ बाट उम्मेदवार बन्ने चर्चा थियो । 

कट्टेल सोही क्षेत्रका मतदाता हुन् । उनले उम्मेदवारी दिने आधिकारिक घोषणा भने गरेका थिएनन् । उम्मेदवारका लागि आफू छलफलमा रहेको उनले बताएका थिए । उनले घोषणा नगरे पनि युवाहरूले सामाजिक सञ्जालमा कट्टेलको चुनावी पोस्टरसहित प्रचार–प्रसारसमेत गरिसकेका थिए । 

उनले उम्मेदवारी दिने कुरालाई लिएर निकै चर्चा भएको थियो । अन्ततः ‘कुमार कट्टेलले स्वतन्त्र उम्मेदवारी दिने’ कुरा चर्चामै सीमित भएको छ । उनी उम्मेदवार बन्नबाट ‘ब्याक’ भएका छन् । उनले आफ्नो उम्मेदवारी दर्ता गराएनन् । 

यतिबेला दर्जन बढी कलाकारहरू आगामी मंसिर ४ मा हुने प्रतिनिधि सभा र प्रदेश सभा निर्वाचनमा होमिएका छन् । जसमध्ये केही कलाकारले विभिन्न दलबाट उम्मेदवार बनेका छन् भने केहीले स्वतन्त्र उम्मेदवारी दर्ता गराएका छन् । 

फिल्म निर्देशक मनोज पण्डित, हास्य कलाकार मधुसुदन पाठक ‘सितेबा’, गायक सञ्जय श्रेष्ठलगायतले स्वतन्त्र उम्मेदवारी दिएका छन् ।