नेपालमा छायांकन गरिएको बलिउड फिल्म ‘उचाइ’को ट्रेलर सार्वजनिक गरिएको छ । सुरज वर्जत्य निर्देशित यो फिल्ममा अमिताभ बच्चन, बोमन इरानी, अनुपम खेर, परिणिती चोपडा र डेनी डेन्जोङ्पाको अभिनय छ । 

फिल्मले चार साथीको मित्रताको कथा भन्छ । एक साथीको सपना पूरा गर्न विश्वकै अग्लो सगरमाथा चढ्न नेपाल आएका ३ पात्रको उतारचढावको कथामा फिल्म निर्माण भएको ट्रेलरबाट आकलन गर्न सकिन्छ । ट्रेलरमा नेपालको हिमालय क्षेत्र र त्यहाँको मनोरम दृश्य समेटिएको छ । 

फिल्ममा परिणितीले नेपाली पथप्रदर्शकको भूमिका निर्वाह गरेको ट्रेलरबाट बुझ्न सकिन्छ । उमेर बढेपछि खुलेर जीवन बाँच्नुपर्छ र आशावादी बन्नुपर्छ भन्ने सन्देश फिल्मले दिने ट्रेलरबाट आकलन गर्न सकिन्छ । केही समयअघि नेपालमा झण्डै एक महिना यो फिल्मको छायाकन गरिएको थियो । 

यो फिल्म नोभेम्बर ११ तारिख (कात्तिक २५)बाट विश्वभर रिलिज हुँदैछ । फिल्मले नेपालको पर्यटन विकास र विदेशी फिल्म छायांकनका लागि ठूलो प्रभाव पार्ने अपेक्षा गरिएको छ ।