नेपाल वायुसेवा निगमको कल साइन नाइन एन- एकेएक्स जहाज मर्मतपश्चात काठमाडौं फर्किएको छ ।

जहाज मर्मतपछि इजरायलबाट दुबई हुँदै शनिवार साँझ ९:५६ बजे काठमाडौंमा अवतरण भएको निगमका प्रवक्ता रमेश पौडेलले जानकारी दिए ।

प्रवक्ता पौडेलका अनुसार उक्त जहाजको एउटा इन्जिनमा प्राविधिक समस्या देखिएपछि मर्मतका लागि इजरायल पठाइएको थियो ।

मर्मतको क्रममा आवश्यक प्राविधिक जाँच गर्दा अन्य प्राविधिक समस्याहरूको अलावा इन्जिन भित्रको ३१ वटा ब्लेड पूरै फेर्नुपर्ने देखिएको थियो ।

'मर्मतका क्रममा आवश्यक प्राविधिक जाँच पड्ताल गर्दा अन्य प्राविधिक समस्याहरूका अतिरिक्त इन्जिनभित्रको ३१ वटा ब्लेड पुरै फेर्नुपर्ने देखिएको र एमआरओ तथा निगमका सम्बन्धित इञ्जिनियरहरू एवं प्राविधिकहरुको प्रतिवेदनअनुसार बजारमा सोसँग सम्बन्धित पार्टपुर्जाहरूको अभाव भएकाले मर्मत सम्भार कार्यमा केही ढिलाइ हुन पुगेको हो', प्रवक्ता पौडेलद्वारा जारी विज्ञप्तिमा जनाइएको छ ।

जहाज मर्मतका लागि ​इजरायलस्थित नेपाली राजदूतावासले गरेको सहयोग र समन्वयका लागि निगमले आभार प्रकट गरेको छ ।

जहाजको इन्जिन मर्मतमा ढिलाई हुन गएको विषयलाई गम्भीरतापूर्वक अध्ययन विश्लेषण गरी सम्झौताअनुसार आवश्यक प्रक्रिया अगाडि बढाइने निगमले जनाएको छ ।​​

उक्त जहाज नियमित उडानमा आएपछि यात्रुहरूको माग र बजार चापलाई अझ सशक्त ढंगले सम्बोधन हुने निगमको विश्वास छ ।