रुसको सारातोभ शहरमा रहेको एक एयरबेसमा युक्रेनले ड्रोन आक्रमण गर्दा दुईवटा बमवर्षक विमान ध्वस्त भएको द डेली मेलले खबर दिएको छ । 

एंगेल्स–२ एयरबेसमा सोमवार बिहानै भएको विस्फोटका कारण टु–९५ बमवर्षक विमानहरू नष्ट भएका हुन् । ती विमानहरू युक्रेनको ऊर्जा संरचनामा हवाई आक्रमण गर्नका लागि उपयोग गरिएका थिए । 

अर्को विस्फोट र्‍याजान शहर नजिक रहेको रुसी सैन्य अड्डामा भएको थियो । त्यसमा परी तीनजनाको मृत्यु भएको र पाँचजना घाइते भएको बताइएको छ । इन्धन बोकेको एउटा ट्रक विस्फोट भएको हो । 

युक्रेन सरकारले यी आक्रमणहरूको जिम्मेवारी नलिएको भए पनि उसले रुसको पश्चिमी सीमामा रहेका डिपोहरूमा यस्तै किसिमका आक्रमण गरेकाले यसमा पनि उसैको संलग्नताको आशंका गरिएको छ ।

एंगेल्स–२ र र्‍याजान युक्रेनी सीमाबाट क्रमशः ३०० र ४५० किलोमिटर टाढा छन् । युक्रेनी क्षेप्यास्त्रहरूको दायरा त्यति टाढासम्मको छैन त्यसैले आक्रमणमा ड्रोन उपयोग गरिएको पक्का हो ।

एंगेल्स–२ एयरबेसका विमानहरूले युक्रेनमा ठूलै आक्रमणको तयारी गरिरहेको भेउ पाएपछि त्यसलाई रोक्न अमेरिकाको सूचना सहयोगमा युक्रेनले यो आक्रमण गरेको हुुनुपर्छ ।