काठमाडौं उपत्यका ट्राफिक प्रहरी कार्यालयले मंसिर महिनामा ६० वटा सवारी चालक अनुमति पत्र (लाइसेन्स) निलम्बनको लागि यातायात व्यवस्था विभाग पठाएको छ ।

पाँचभन्दा बढीपटक ट्राफिक नियम उल्लंघन गरेको पाइएपछि ती अनुमति पत्र निलम्बनका लागि विभागमा पठाइएको हो । सवारी तथा यातायात व्यवस्था ऐन २०४९ र नियमावली २०५४ मा चालकले पालना गर्नु पर्ने सर्त तथा नियमहरू पाँच (५) पटकभन्दा बढी उल्लंघन गरेको पाइएमा निलम्बन गर्न सकिने व्यवस्था छ । 

काठमाडौं उपत्यका ट्राफिक प्रहरी कार्यालय रामशाहपथका प्रवक्ता एवं प्रहरी वरीष्ठ उपरीक्षक राजेन्द्रप्रसाद भट्टका अनुसार निलम्बनका लागि पठाइएकोमा एक चालक ४४ पटक कारबाहीमा परेका छन् । एकजना ३५ पटक, तीन जना २४ पटक र एकजना १४ पटक कारबाहीमा परेका छन् । 

त्यस्तै सात जना १२ पटक, दुई जना चालक सात पटक र ४५ जना छ पटक कारबाहीमा परेकाले लाइसेन्स निलम्बनको कारबाही अगाडि बढाइएको भट्टले जानकारी दिए । 

ट्राफिका नियम उल्लघंन गरिरहने चालकहरूबाट नै बढी सवारी दुर्घटना भएको तथ्यांकले समेत देखाएको छ । सोही कारण उनीहरूको लाइसेन्स निलम्बनको प्रक्रिया अगाडि बढाइएको ट्राफिक प्रहरीले जनाएको छ ।