पृथ्वीनारायण शाहको नेतृत्वमा निर्माण भएको आधुनिक नेपालको जग बलियो भएकै कारण नेपाली भएर गर्वका साथ बाँच्न पाएको वक्ताहरुले बताएका छन् ।  ३०१ औं पृथ्वी जयन्ती तथा राष्ट्रिय एकता दिवसको अवसरमा राप्रपा पाँचथर जिल्ला कार्य समितिद्वारा आयोजित शुभकामना आदानप्रदान कार्यक्रममा बोल्दै प्रवक्ता सगुन सुन्दर लावतीले नेपाल एकीकरणले भूगोलमात्र नभएर नेपाल र नेपालीको आम भावना समेटेको बताए । 

‘सैन्य रणनीति, कुटनीति र सहअस्तित्वबोधका धरातलमा सम्पन्न नेपाल एकीकरणले भूगोल मात्र नभएर नेपाल र नेपालीको आम भावना समेटेको छ । मन, मस्तिष्क र भावनाको एकता नभएको भए, आधुनिक नेपाल अहिलेसम्म कसरी एकजुट रहन सक्थ्यो होला,’  लावतीले भने ।

हालसम्मकै सबैभन्दा बृहद सामाजिक, राजनीतिक परिवर्तन र रुपान्तरण पृथ्वीनारायण शाहको नेतृत्वमा प्राप्त भएको भन्दै राप्रपाका नेता लावतीले भने, ‘शान्ति, समृद्धि र समावेशीकरणको नारा र लक्ष्य लिएका पछिल्ला परिवर्तनहरुले बरु सबै नेपालीको भावना र आकांक्षा एकीकृत गर्न, सम्बोधन गर्न सफल भएन ।’

लावतीले नेपाली एकीकरणकै क्रममा लिम्बुवानका शासक र गोर्खा राज्यबीच सहअस्तित्वको आधारमा किपटलगायत अन्य अधिकारका सम्मान गर्दै सन्धि संझौता भएको स्मरण गरे ।

राप्रपाका केन्द्रीय सदस्य मानदेव केरुङले पृथ्वी जयन्तीको दिन बिदा दिने राज्यको निर्णयलाई स्वागत गर्दै शाहका दिव्योपदेश आज पनि उत्तिकै सान्दर्भिक रहेको बताए ।

राप्रपाका केन्द्रीय सल्लाहकार सदस्य राजकुमार जोशीले विदेशी हस्तक्षेप बढीरहेको वर्तमान अवस्थामा नेपाल निर्माता पृथ्वीनारायण शाहका ‘नेपाल दुई ढुंगा बीचको तरुल हो’ भन्ने दिव्य विचार अनुकूल असंलग्न परराष्ट्र नीति व्यवहारमा अक्षरक्षः पालना गर्नु पर्ने बताए ।

नेपाली कांग्रेसका जिल्ला सचिव दिपक नेपाल, नेकपा माओवादी केन्द्रका जिल्ला नेता लालबहादुर गुरुङ, नेकपा एकीकृत समाजवादीका जिल्ला सचिव प्रेम रिजाल, नेकपा मालेका केन्द्रीय सल्लाहकार लय बाँस्कोटा, संघीय लोकतान्त्रिक राष्ट्रिय मञ्चका जिल्ला अध्यक्ष चन्द्र आङदेङवे, प्रमुख जिल्ला अधिकारी गणेश गैरे तथा उद्योग वाणिज्य संघका अध्यक्ष नवराज घिमिरेले पृथ्वी जयन्तीको महत्वबारे प्रकाश पार्दै खुला हृदयका साथ राष्ट्रिय एकता दिवस मनाउनु पर्ने धारणा राखे ।