कांग्रेस प्रवक्ता डा. प्रकाशशरण महतले सभामुख र उपसभामुखमा एमाले अध्यक्ष केपी ओलीको तजबिजी चलेको भन्दै राष्ट्रपति चुनावमा प्रधानमन्त्री पुष्पकमल दाहाल प्रचण्डको लागि परीक्षाको घडी भएको बताएका छन् ।

उपसभामुखमा राष्ट्रिय स्वतन्त्र पार्टीकी इन्दिरा राना विजयी भएपछि संसद भवनबाट बाहिरिंदै ओली समर्थितहरू एकपछि अर्को गर्दै जितेपछि संविधान रक्षाको प्रश्न उठेको बताएका हुन् । 

‘प्रधानमन्त्रीले संविधान रक्षाको कुरा गरेपछि हामीले उहाँलाई विश्वासको मत दिएका हौँ । संविधान रक्षाका लागि भनेर हिजो उहाँले हामीसँग गठबन्धन गर्नुभएको थियो तर पुरानो गठबन्धन छाडेर जानुभयो । अहिलेको परिवेशमा केपी ओलीजीबाट संविधानमाथि झन् खतरा बढेको हामीले बुझेका छौं’ महतले भने, ‘संसद् विघटनको कुरा उहाँले प्रमुख विषयका रुपमा उठाउनुभयो । संविधानको पक्षमा उभिने कि नउभिने प्रधानमन्त्री सभामुख र उपसभामुख चुनावमा उहाँ उत्तीर्ण हुनुभएन । अब राष्ट्रपति र उपराष्ट्रपतिको चुनावमा सबैभन्दा महत्त्वपूर्ण परीक्षणको घडीमा प्रधानमन्त्रीजी हुनुहुन्छ ।’

नयाँ गठबन्धनबाट प्रधानमन्त्रीमा प्रचण्ड चुनिएपछि सभामुख एमाले र उपसभामुखमा राष्ट्रिय स्वतन्त्र पार्टी विजयी भएको छ । यी दुवै पदमा प्रतिपक्षी कांग्रेस उम्मेदवार पराजित भएका छन् । 
अब माघ २८ भित्र राष्ट्रपतिको चुनाव गरिसक्नुपर्ने हुन्छ । 

अहिलेको सत्ता गठबन्धनको भागबन्डा अनुसार राष्ट्रपति एमालेले लिनेछ ।