उपप्रधान तथा अर्थमन्त्री एवं नेकपा (एमाले) का उपाध्यक्ष विष्णु पौडेलले राष्ट्रपतिमा नेकपा (एमाले) ले उठाएको उम्मेदवारले जित्ने दाबी गरेका छन्। 

बुधवार नयाँ बानेश्वरस्थित संसद भवनमा सञ्चारकर्मीसँग कुराकानी गर्दै उनले वर्तमान सरकार बन्दा नै राष्ट्रपति एमालेले पाउने सहमति भएकाले जित्ने दाबी गरे। 

सत्तारुढ गठबन्धनमा भएको भागवण्डाको सहमति कार्यान्वयन हुने उनले बताए। 

‘यो सरकार जुन पृष्ठभुमिको बन्यो । यो सरकार बन्दा जेजस्तो सहमति सरकारमा सहभागी दलहरूबीच बनेको छ । त्यो सहमति नै एमालेका तर्फबाट अघि सारेको उम्मेदवारको जितको आधार हो । म के कुरामा विश्वस्त छु भने सरकार गठनको पृष्ठभूमिमा सरकारमा सहभागी, सरकारलाई समर्थन गर्ने दलहरूबीच जुन सहमति भएको छ, त्यो सहमति कार्यान्वयन हुन्छ । र नेकपा एमालेका तर्फबाट अघि सारिएको राष्ट्रपतिको उम्मेदवारले शानदार ढंगले जित हासिल गर्नुहुन्छ ।’

त्यस्तै एमाले सचिव गोकर्ण विष्टले एमाले उम्मेदवारलाई राष्ट्रपतिमा निर्वाचित गराउनु नै राष्ट्रिय सहमति हुने बताए। 

एमालेले जुन उम्मेदवारलाई राष्ट्रपतिको रुपमा प्रस्ताव गर्छ उसले नै जित्ने दाबी गरे। 

उनले सत्तारुढ गठबन्धनका बीचमा भएको सहमति प्रधानमन्त्रीले इमानदारीतापूर्वक कार्यान्वयन गर्नुपर्ने बताए।