३१ असार २०८३, बुधबार
नेपाली कांग्रेसका सभापति एवं संसदीय दलका नेता शेरबहादुर देउवाले कांग्रेस संसदीय दलको कार्य समितिमा रहेका सदस्यहरुसँग आज विहान छलफल गरेका छन् । धुम्बाराहीस्थित आफ्नै निवासमा उनले पार्टीको संसदीय दल कार्यसमितिका सदस्यहरुसँग छलफल गरेका हुन् ।
सभापति देउवाको सचिवालयले दिएको जानकारी अनुसार उनले समसामयिक राजनीतिक घटनाक्रम र अबको कार्यनीतिबारेमा परामर्श गरेका हुन् । छलफलमा महामन्त्री, प्रतिनिधि सभा र राष्ट्रिय सभाका प्रमुख सचेतक समेतको उपस्थिति थियो ।
नेकपा एमाले र राष्ट्रिय प्रजातन्त्र पार्टीले पुष्पकमल दाहाल प्रचण्ड नेतृत्वको सरकारलाई दिएको समर्थन फिर्ता लिएपछि प्रधानमन्त्रीले विश्वासको मत लिने तयारी गरिरहेका बेला सभापति देउवाले सो विषयमा परामर्श शुरु गरेका छन् ।
सरकारमा सहभागिता र विश्वासको मत तथा राष्ट्रपति निर्वाचनलगायत विषयमा सभापति देउवाले संसदीय दल कार्यसमिति बैठकमा छलफल गरेको उनको सचिवालयले जनाएको छ । बैठकमा फागुन २५ मा हुने राष्ट्रपति निर्वाचन र पार्टीको तर्फबाट उम्मेदवार बनेका वरिष्ठ नेता रामचन्द्र पौडेललाई निर्वाचित गर्ने विषयमा समेत सभापति देउवाले आवश्यक परामर्श गरेका छन् ।
