२१ असार २०८३, आइतबार
सरकार विस्तारको विषयमा छलफल गर्न प्रधानमन्त्री पुष्पकमल दाहाल 'प्रचण्ड'सहितका सत्ता गठबन्धनमा आबद्ध दलका शीर्ष नेताको बैठक प्रधानमन्त्री निवास बालुवाटारमा बसेको छ ।
बिहीबार साँझ ५ बजेपछि बालुवाटारमा प्रधानमन्त्री प्रचण्ड, कांग्रेस सभापति शेरबहादुर देउवा, जसपा अध्यक्ष उपेन्द्र यादव, नेकपा एसका अध्यक्ष माधवकुमार नेपालबीच छलफल भएको हो ।
छलफलमा छिटो सरकार विस्तार गर्ने विषयमा केन्द्रित भएको जानकारी प्रधानमन्त्रीको सचिवालयले जनाएको छ ।
‘सरकार विस्तारकै विषयमा छलफल गर्न प्रधानमन्त्रसहित कांग्रेस सभापपति र अरू १/२ दलका शीर्ष नेता बालुवाटार आउनुभएको छ’, प्रधानमन्त्री निकट स्रोतले लोकान्तरसँग भन्यो, ‘प्रधानमन्त्रीले छिटो सरकार विस्तार गर्ने तयारीस्वरुप सत्ता साझेदार दलसँग छलफल गर्नुभएको हो ।’
कांग्रेसबाट सभापति शेरबहादुर देउवा र उपसभापति पूर्णबहादुर खड्का सहभागी छन् ।
प्रधानमन्त्रीले ६ चैतमा दोस्रोपटक विश्वासको मत लिएलगत्तै सरकार विस्तार गर्ने बताएका थिए । तर सरकारमा सहभागी हुने दलको संख्या धेरै भएपछि भागबण्डा मिलाउन दलहरूलाई सकस परेको छ ।
बाँकी मन्त्रालयभन्दा दाबेदार दल र दलभित्र मन्त्रीका आकांक्षी धेरै भएपछि सरकार विस्तारमा ढिलाइ भएको हो ।
बुधबार पनि सत्तारुढ शीर्ष चार दलका नेताको बैठक बालुवाटारमा बसेको थियो ।
