नेपाल आयल निगमले घटाएको पेट्रोलियम पदार्थको मूल्य सोमवार मध्यरातिबाट लागू भएको छ ।

निगमका अनुसार डिजेल, मट्टीतेल र हवाई इन्धनको मूल्य लिटरमा १० रुपैयाँ र पेट्रोलको मूल्य लिटरमा ३ रुपैयाँले घटाउने निर्णय भएको छ ।

निगमले सोमवार प्रेस विज्ञप्ती जारी गरी मूल्य घटेसँगै पेट्रोलको बिक्री मूल्य प्रतिलिटर १७५ रुपैयाँ, डिजल र मट्टीतेलको बिक्री मूल्य प्रतिलिटर १६५ रुपैयाँ कायम भएको जनाएको हो । आन्तरिकतर्फ हवाई इन्धन प्रतिलिटर १६० रुपैयाँमा बिक्री हुनेछ ।

भारतीय आयल कर्पोरेसनबाट मूल्य घटेर आएसँगै सोमवार बसेको निगम सञ्चालक समिति बैठकले इन्धनको मूल्य घटाउने निर्णय गरेको हो । ‘निगमले सरकारको ऋण र ईन्डियन आयल कर्पोरेसन लिमिटेडलाई हाल तिर्नुपर्ने बक्यौता रकम करीब १४ अर्ब बाँकी रहेको अवस्था समेतमा आमउपभोक्तालाई सहज एवं सरल ढंगबाट पेट्रोलियम पदार्थ बिक्री वितरण गर्ने व्यवस्था मिलाउँदै आइरहेको छ,’ विज्ञप्तिमा भनिएको छ ।