नेकपा माओवादी केन्द्रका नेता वर्षमान पुनकी आमामाथि गोली प्रहार भएको छ ।

शुक्रवार राति साढे ९ बजे काठमाडौंको बालुवाटार नजिकको निवासमा पुनकी आमामाथि भीभीआईपीको पछुवा गाडीमा हिँड्ने प्रहरीका पीएसओले गोली चलाउँदा पुनकी आमा ७४ वर्षीया तीर्थमाली घाइते भएकी हुन् ।
 
गोली प्रहार गर्ने प्रहरी सहायक हवल्दार प्रकाश पुन हुन् । नयाँ वर्ष मनाउने क्रममा नातेदार पनि पर्ने पुनको घरमा प्रकाश आएका पारिवारिक स्रोतको भनाइ छ । प्रकाश वर्षमानका भाइ प्रनिशका साथी समेत रहेका पारिवारिक स्रोत बताउँछ ।

आमा तीर्थमाली प्रनिश र डेडिड पुनसँग बस्थिन् । यी दुवै वर्षमानका भाइ हुन् । अघिपछि पनि आइरहने उनी नयाँ वर्ष मनाउन पुनको घरमा पुगेका थिए । 

‘त्यस्तो नजिकको नातेदार त होइन तर हामीले पनि वर्षमान दाइको भाइ प्रनिशको साथी भएकाले घरमा आएको र गोली चल्दा आमाको खुट्टा लागेको बुझेका छौं,’ वर्षमान निकट स्रोतले भन्यो, ‘गोली प्रहार गरेका भनिएका प्रकाश वर्षमानकै भाइ प्रनिशका साथी भएको पनि बुझेका छौं । नयाँ वर्षको जमघटमा जम्मा हुँदा यस्तो घटना भएको हुनसक्छ ।’

गोली प्रहार गर्ने पुन कायममुकायम प्रधानन्यायाधीश हरिकृष्ण कार्कीको सुरक्षाको पछुवा गाडीमा हिँड्ने हवल्दार रहेका प्रहरीले जनाएको छ । असावधानीपूर्वक प्रकाशले पेस्तोल चलाउँदा पुनकी आमाको खुट्टामा गोली लागेको प्रहरीको प्रारम्भिक भनाइ छ । गोली प्रहार गर्ने प्रहरीलाई प्रहरी प्रधान कार्यालयमा राखेर अनुसन्धान गरिँदैछ ।

गोली प्रहार गर्नेले मादक पदार्थ सेवन गरेको पनि प्रहरीको भनाइ छ । गोली प्रहारलगत्तै भागेका उनलाई प्रहरीले शनिवार बिहान नियन्त्रणमा लिएको हो । तीर्थमालीको देब्रे खुट्टाको बुढी औंलामा गोली लागेको बताइएको छ । उनको अवस्था सामान्य रहेको छ ।