नेपाल टेलिकमले सीडीएमए प्रविधिलाई विस्थापन गर्ने क्रममा ३ लाख १९ हजार ६ सय ९४ ग्राहकलाई प्याकेजसहित बिदा गर्ने भएको छ । टेलिकमले २०६२ माघ २३ गतेबाट ठूलो क्षेत्रको कभरेजका लागि सीडीएमए प्रविधिको औपचारिक शुभारम्भ गरेको थियो ।

टेलिकमको मोबाइल क्षेत्रमा ठूलो योगदान दिएको यो प्रविधिलाई नयाँ र सहज प्रविधिको जीएसएम मोबाइलको विस्तारसँगै सीडीएमए विस्थापन गर्ने निर्णय टेलिकमले यस अघि नै गरिसकेको थियो । टेलिकमले २०२२ देखि सीडीएमएलाई बन्द गर्ने निर्णय गरेको भएपनि यसका ग्राहक अझै ३ लाख भन्दा बढी छन् ।

टेलिकमले सेवा विस्तार गर्दै २०७५ चैतमा १६ लाख ग्राहक पुर्‍याएको यो प्रविधिलाई त्यसपछि भने थप लगानी नगरेर घटाउँदै गएको हो । टेलिकमले २०७५ को फागुनमै सीडीएमए प्रविधिमा थप लगानी नगर्ने र भइरहेको सेवा पनि पाँच वर्षपछि बन्द गर्ने निर्णय गरेको थियो । 

टेलिकमका प्रवक्ता शोभन अधिकारीकाअनुसार विश्वमा सीडीएमए प्रविधिमा इनोभेसन हुन छोडेको र जीएसएम प्रविधि सहज र धेरै इनोभेसन हुने भएकाले पुरानो प्रविधिलाई छोड्दै जानुपरेको हो । पुरानो प्रविधि छोडर नयाँमा जाने निर्णयसहित टेलिकमले कम्तीमा ५ वर्ष अगाडि नै ग्राहकलाई सुसूचित भने गर्दै आएको थियो । अहिले पनि सीडीएमएका सिम प्रयोगमा रहेकोले यसलाई अब भने प्याकेजसहित विस्थापन गरिने भएको छ । 

टेलिकमकाअनुसार सीडीएमएका सिम प्रयोग गरिरहेका ग्राहकलाई जीएसएमको नयाँ नम्बर दिने र ६ महिनासम्म नम्बर परिवर्तन भएको जानकारी दिइरहने सुविधा दिइएको छ । यसले ग्राहकलाई सहज हुने बुझाई प्रवक्ता अधिकारीको छ । 

पछिल्लो समय  जीएसएम मोबाइलमा थ्रीजी, फोरजी हुँदै फाइभजीसहितको नयाँ प्रविधि आइसकेको छ । पुरानो प्रविधिको सीडीएमएमा नयाँ प्रविधि थप नभएको र यसमा लगानी नहुँदा ग्राहक आफैं विस्थापित हुँदै जान थालेको टेलिकमको भनाइ छ । टेलिकमले थप लगानी नगरेको र आधुनिक र सहज प्रविधि भित्रिएकै कारण गत साउनदेखि नै वाइम्याक्स नामकको इन्टरनेटलाई पूर्ण रूपमा विस्थापन गरिसकेको छ । टेलिकमको सीडीएमए मोबाइल प्रयोगकर्ता जीएसएममा सिफ्ट भइरहेका छन् । ​

फाइभजी विस्तारमा जोड

टेलिकमले विगत २ महिनादेखि जीएसएम मोबाइलमा फाइभजी परीक्षण गरिरहेको छ । टेलिकमले आन्तरिक परीक्षण गरिरहेको यो यसलाई विस्तार गर्दै जाने भएको छ । 

हाल काठमाडौंको सुन्धारा, बबरमहल, पोखरा र वीरगन्जमा परीक्षण भइरहेको छ । सातै प्रदेशमा परीक्षण गर्न टेलिकमले यसको लागि आवश्यक डिभाइस आयात गर्ने अनुमति १ मंसिरमै मागेको छ । यसको अनुमति आइनसकेकाले थप उपकरण ल्याउन नपाएको टेलिकमले जनाएको छ ।

टेलिकमले थप उपकरण ल्याएर सातै प्रदेशमा फाइभजी परीक्षण गर्ने र त्यसको नतिजापछि मात्रै व्यावसायिक प्रयोगमा जाने निर्णय गर्ने टेलिकमले जानकारी दिएको छ । 

टेलिकमकाअनुसार हाल फाइभजी जम्मा २०० मिटरको क्षेत्रभित्र मात्रै परीक्षण गर्न सकिने क्षमताको छ । अहिले टेलिकमले २६०० मेगाहर्जमा परीक्षण गरिरहेको यो प्रविधि व्यावसायिक प्रयोगमा आउँदा ठूलो क्षमता तथा कम ब्यान्डविथमा पनि हुनसक्ने छ । 

अहिले सरकारले टेलिकमलार्ई मात्रै फाइभजीको परीक्षण अनुमति दिएको छ । सरकारी संस्थाले सफल प्रयोग गरेपछि मात्रै अन्य कम्पनीलाई दिने सरकारको योजना छ ।