विराटनगरमा यस वर्षको उभौली पर्व सडकमै  मनाइने भएको छ ।

कोशी प्रदेश नामकरणको विरोध स्वरूप विराटनरमा बसोबास गर्दै आइरहेका राई, लिम्बू र याक्खा जातिले सडकमा उभौली मनाउने भएका हुन् ।

अघिल्ला वर्ष आ–आफ्नो आस्थाका कूल देवताको पूजाआराधना गर्दै साकेला र च्याब्रुङ नाचेर साकेला थानमा मनाउने गरिन्थ्यो ।

फागुन १७ गते १ नम्बर प्रदेशले कोशी नाम पाएसँगै सडक आन्दोलनमा रहेका जातीय पहिचान पक्षधरले यसपटक ‘सडकमै जुटौं, सडकमै नाचौं’ मूल नाराका साथ उभौली मनाउने बताएका छन् ।  

किरात राई यायोक्खा, किरात याक्थुङ चुम्लुङ र किरात याक्खा छुम्माले संयुक्त रूपमा परम्परागत कला संस्कृति र पहिरनसहित विराटनगरको महेन्द्र चोक, ट्राफिक चोक हुँदै रोडशेष चोकमा प्रदर्शन गर्ने तयारी रहेको चुम्लुङका नगर अध्यक्ष कुमार सुब्बाले जानकारी दिए ।

सुब्बाका अनुसार बिहान ७ बजे थानमा पूजा गरेर साकेला थानमा भेला भई रोडशेष चोकमा साकेला,  च्याब्रुङ नाच्ने तयारी छ । आफ्नो संस्कृतिअनुसार स्रोतसाधनहरू सांस्कृतिक अभियानस्वरूप प्रदर्शन गर्ने  केन्द्रको निर्देशनअनुरूप विराटनगरमा किरात याक्थुङ चुम्लुङ, किरात राई यायोक्खा, याक्खा छुम्मा संयुक्त रूपमा साकेला थानमा भेला भएर २ बजेबाट आफ्नो वेशभूषा लगाएर साकेला थान हुँदै महेन्द्र चोक, ट्राफिक चोक परिक्रमा गरेर रोडशेष चोकमा कला प्रदर्शन गरेर मनाउने कार्यक्रम रहेको सुब्बाले बताए । 

उभौली पर्व वसन्त ऋतुमा बालीनाली राम्रो होस्, सबैमा सुख, शान्ति, सुस्वास्थ्य रहोस् र प्रकोप तथा विपत्तिहरू नआउन् भनि पूजा गर्ने प्रचलन छ । यस चाडमा सुनुवार र राईहरू साकेला/सखेवा शिली नाच्छन् भने लिम्बु र याक्खाहरूले च्याब्रुङ, डोकेनी नाच नाच्दै प्रकृतिलाई पूजा गर्ने चलन रहेको छ ।