विकलले २ विदेशी बैंकमा बुझेका थिए २९ करोड कमिसन, अमेरिकामा किनेको घरको पनि स्रोत खुलेन

गैरकानूनी रूपमा ६२ करोड भन्दा बढी सम्पत्ति आर्जन गरेको आरोपमा सुरक्षण मुद्रण केन्द्रका तत्कालीन कार्यकारी निर्देशक विकल पौडेलविरुद्ध भ्रष्टाचार मुद्दा दायर भएको छ ।

६२ करोड १९ लाख १८ हजार ६८४ रुपैयाँ​ गैरकानूनी ढंगले आर्जन गरी भ्रष्टाचार गरेको निष्कर्षसहित अख्तियार दुरुपयोग अनुसन्धान आयोगले बुधबार विशेष अदालतमा मुद्दा दायर गरेको हो ।

यस अवधिमा उनको वैध आय २ करोड १ लाख ४३ हजार ४८८ रुपैयाँ मात्र रहेको अभियोगपत्रमा उल्लेख छ ।

उनले नेपालमा सामान सप्लाई गर्ने विदेशी आपूर्तिकर्ताहरूसँगको मिलेमतोमा सिंगापुर र अमेरिकास्थित बैंक खातामा 'कमिसन' रकम बुझ्ने गरेका थिए ।

​सिंगापुरस्थित युनाइटेड ओभरसिज बैंक र अमेरिकाको बैंक अफ अमेरिकामा रहेको खातामा उनले २८ करोड ९५ लाख ७५ हजार ६८९ रुपैयाँ बुझेको देखिएको अभियोग पत्रमा उल्लेख छ ।

सो रकम जफत गर्नुपर्ने माग दाबी अख्तियारले लिएको छ ।

सुरक्षण मुद्रण केन्द्रको कार्यकारी निर्देशक रहेकै समयमा उनले आफ्नो पदीय व्यहोरा लुकाई अन्तर्राष्ट्रिय परामर्शदाता तथा एजेन्टका रूपमा काम गरी साढे १० लाख रुपैयाँ बुझेको पनि अख्तियारले उल्लेख गरेको छ ।

विकलले श्रीमती एलिना बस्नेतको नाममा अमेरिकामा खरिद गरेको घरको स्रोत समेत खुलाउन नसकेको अभियोग पत्रमा उल्लेख छ । उक्त घरको तत्कालीन मूल्यांकन ६ करोड ५ लाख ३३ हजार १ सय रुपैयाँ रहेको छ ।

हेर्नुहोस्, आरोप पत्र :