विपक्षी दलहरूको अवरोधका कारण एक घण्टाका लागि स्थगित भएको संसद बैठक भोलि (सोमवार)सम्मका लागि सरेको छ । संसद सचिवालयले सूचना टाँस गरेर बैठक सोमवार बिहान ११ बजे बस्ने जानकारी दिएको हो ।

यसअघि आज (आइतवार) बैठक शुरू हुनासाथ नेकपा एमाले, राष्ट्रिय स्वतन्त्र पार्टी र राप्रपाका सांसदहरूले नागरिकता विधेयक प्रमाणीकरणलगायत विषयमा विरोध जनाउँदै संसद् अवरुद्ध गरेका थिए । 

विपक्षी दलका सांसदहरूले उठेर नाराबाजी गरेपछि सभामुखले एक घण्टाका लागि बैठक स्थगित गरेका थिए ।

आज पूर्वनिर्धारित कार्यसूचीअनुसार बजेटमाथि छलफल गर्ने कार्यसूची थियो । 

राष्ट्रपतिबाट संसद् छलेर असंवैधानिक रूपमा नागरिकता विधेयक प्रमाणीकरण गरेको तथा प्रधानमन्त्रीले विदेशी भूमिमा गएर देशको भूभाग साटफेर गर्ने भनी दिएको अभिव्यक्ति राष्ट्रघाती रहेको भन्दै एमालेले जवाफ मागेको छ ।

राष्ट्रपतिले प्रमाणीकरण गरेको विधेयक निष्क्रिय बनाई एक हप्ताभित्र सरकारले संसद्मा अर्को विधेयक ल्याउनुपर्ने उनीहरूको माग छ । 

तत्कालीन राष्ट्रपति विद्यादेवी भण्डारीले रोकेको विधेयक राष्ट्रपति रामचन्द्र पौडेलले जेठ १७ गते प्रमाणीकरण गरेका थिए ।

भ्रमणका क्रममा प्रधानमन्त्री प्रचण्डले भारतले बङलादेश जाने बाटो दिए नेपालको भूमि लिपुलेक, लिम्पियाधुरा र कालापनीबारे सोच्न सकिने अभिव्यक्ति दिएका थिए ।