एमाले नेता भीम रावलले राष्ट्रिय सुरक्षा परिषदमा पूर्व मुख्यसचिव शंकरदास वैरागीको नियुक्तिबारे प्रश्न उठाएका छन् । बिहीबार बसेको मन्त्रिपरिषद बैठकले वैरागीले मुख्यसचिव पदबाट दिएको राजीनामा स्वीकृत गर्दै उनलाई राष्ट्रिय सुरक्षा परिषदमा सल्लाहकारको जिम्मेवारी दिएको थियो । 

तर, रावलले संविधानतः मन्त्री सरहको सल्लाहकार बनाइ परिषदमा रहने व्यवस्था नभएको जिकिर गरेका छन् । 
‘नेपालको संविधानको धारा २६६ अनुसार राष्ट्रिय सुरक्षा परिषदमा  प्रम, रक्षा, गृह, परराष्ट्र, अर्थ मन्त्री, मुख्य सचिव र प्रधान सेनापति रहन्छन्। कसैलाई मन्त्री सरहको सल्लाहकार बनाइ परिषदमा रहने व्यवस्था छैन’, रावलले ट्वीटरमार्फत भनेका छन्, ‘सरकारले नियुक्त गरेका सल्लाहकारको काम र स्थान के र कहाँ हो ? स्पष्ट गरियोस् ।’