मुलुकभर ५३ प्रतिशत धान रोपाइँ सम्पन्न भएको छ ।

कृषि विभागले प्रदेशसँगको समन्वयमा तयार गरेको असार २९ गतेसम्मको धान रोपाइँको  तथ्यांकअनुसार मुलुकभर ५३ प्रतिशत मात्रै रोपाइँ सम्पन्न छ । 

गत वर्ष २०७९ को असार २९ सम्म ६५ प्रतिशत रोपाइँ सम्पन्न भएको  थियो । गत वर्षको तुलनामा यो वर्ष १२ प्रतिशतको हाराहारीमा कम रोपाइँ भएको छ ।​

विशेषगरि मधेश प्रदेश, कोशी प्रदेश र बागमती प्रदेशमा मनसुन शुरु हुन ढिलो भएको कारण कम रोपाइँ भएको विभागको अनुमान छ ।

कर्णाली र सुदूरपश्चिम प्रदेशमा भने लम्पी स्कीन रोगका कारण गोरुको अभाव भइ रोपाइँ थोरै प्रभावित भएको विभागले जनाएको छ ।

मनसुन सक्रिय भइरहँदा तथा रासायनिक मलको उपलब्धता सुनिश्चित हुँदा रोपाइँको प्रतिशत बढ्न सक्ने विभागको अनुमान छ ।