प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले सरकार कति दिन चल्छ भन्नेमा आफूलाई कुनै चिन्ता नरहेको बताएका छन् । 

सरकार जोगाउन यसोउसो गर्‍यो भन्नु वाइयात रहेको उनले टिप्पणी गरे । 

समाजवादी मोर्चाको कर्णाली प्रदेश भेलालाई बिहीवार सुर्खेतमा सम्बोधन गर्दै प्रचण्डले राम्रो काम गर्दा सरकारलाई कसैले हटाउन नसक्ने बताएका हुन् ।

‘सरकार कति समय चल्छ/चल्दैन त्यसमा मेरो टेन्सन छैन । सरकार जोगाउन यसो गर्‍यो, उसो गर्‍यो भन्छन्, वाहियात कुरा । राम्रो काम गर्दागर्दै कसले हटाउने रहेछ, हेरौं,’ प्रचण्डले भने ।

सरकारले राम्रो काम गर्दा गठबन्धन भत्काउन षडयन्त्र भइरहेको पनि उनले दाबी गरे । 

‘यो पटक गठबन्धन र सरकारको तर्फबाट भ्रष्टाचारविरुद्ध र सुशासनको पक्षमा एउटा लडाईं शुरू भएको छ, यो रोकिनेवाला छैन । गठबन्धन, यो सरकार र समाजवादी मोर्चा एकढिक्का भएर लक्षप्रति अगाडि बढेका छौं,’ प्रचण्डले भने ।  

उनले भ्रष्टाचारमा संलग्न रहेको पाइए आफूलाई समेत अनुसन्धानको दायरामा ल्याउन प्रहरीलाई निर्देशन दिइएको दाबी गरे ।

‘सरकार जोगाउन आफ्नो मान्छे बचाउँछ, कांग्रेस र एमालेलाई मात्र पक्राउ गरेको भनेर कतिपयले आरोप लगाइरहेका छन् । दोषी देखिन्छ भने माओवादीको नेता र बाटोमा प्रचण्ड देखिए उसलाई पनि नछाड भनेको छु,’ प्रचण्डले भने ।  

अध्यक्ष प्रचण्डले समाजवादी मोर्चा प्रारम्भ मात्र रहेको भन्दै कम्युनिस्ट आन्दोलन एकीकृत गर्ने योजनामा समाजवादी मोर्चा बनेको बताए ।

‘समाजवादी मोर्चा प्रारम्भ हो, हेर्दै जानुस्, कहाँ पुग्छ । सिंगो कम्युनिस्ट पार्टीलाई एकजुट गर्ने हो,’ उनले भने ।