नेसनल पेमेन्ट गेटवे प्रकरणमा भ्रष्टाचार मुद्दा दायर भएपछि उद्योग, वाणिज्य तथा आपूर्ति मन्त्रालयका सचिव मधुकुमार मरासिनी स्वत: निलम्बनमा परेका छन् ।

आवश्यक पूर्वाधार नै तयार नगरी अस्वाभाविक लागत स्वीकृत गरेर २५ करोड रुपैयाँमा पेमेन्ट गेटवेसम्बन्धी सफ्टवेर खरिद गरेको विषयमा अर्थ मन्त्रालयको बजेट तथा कार्यक्रम महाशाखाका तत्कालीन प्रमुख समेत रहेका सचिव मधुकुमार मरासिनीसहित ९ जनाविरुद्ध अख्तियार दुरुपयोग अनुसन्धान आयोगले सोमवार करीब सवा २३ करोडको भ्रष्टाचार मुद्दा दायर गरेको हो ।

मुद्दा दायर भएपछि कर्मचारी स्वत: निलम्बनमा पर्ने अख्तियार दुरुपयोग अनुसन्धान आयोगका प्रवक्ता भोला दाहालले लोकान्तरलाई जानकारी दिए ।

मन्त्रालयका एक कर्मचारीका अनुसार मरासिनी सोमवार कार्यालय आएका छन् । उनी मन्त्रालयमै रहेका बेला भ्रष्टाचार मुद्दा दायर भएको हो ।

आफ्नो ओहदाको कर्तव्य पालना गर्दा नेपाल सरकार/सार्वजनिक संस्थाको सम्पत्ति लापरबाही तथा बदनियत गरी २३ करोड २७ लाख ५८ हजार ७७ रुपैयाँ हानी नोक्सानी पुर्‍याएको अभियोग उनीसहितका प्रतिवादीहरूमाथि छ ।