देश–विदेशबाट भूकम्प पीडितलाई सहयोग, सरकार एकद्वार प्रणालीमा

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–

शुक्रबार गएको भूकम्पपछि देशविदेशबाट सहयोग आउने क्रम जारी छ । विभिन्न राजनीतिक दल, सरकारी निकाय, स्थानीय तहलगायतले भूकम्प पीडितलाई सहयोग गर्ने निर्णय गरिसकेका छन् । यस्तै चीनसहित विभिन्न मित्र राष्ट्रहरुले पनि सहयोग गर्ने बताइसकेका छन् । 

प्रवासी नेपालीहरुले पनि दुःखको घटीमा राहत संकलन गरेका छन् । सरकारले सबै राहत सामग्री एकद्वार प्रणालीबाट वितरणको नीति लिएको छ । भूकम्पबाट जाजरकोट र रुकुम पश्चिम सबैभन्दा बढी प्रभावित भएको रिपोर्टहरुमा जनाइएको छ ।
०००००
गृह मन्त्रालयले जाजरकोट भूकम्पमा मृत्यु भएका एक सय ५७ जनाको शव सनाखत गरी आफन्तलाई बुझाइएको जनाएको छ । 
मन्त्रालययका प्रवक्ता नारायणप्रसाद भट्टराईले खोज, उद्धार तथा राहत व्यवस्थापनमा सरकारका सबै निकाय सक्रिय रहेका जानकारी दिँदै घाइतेहरु उपचारपछि घर फर्कन थालेका जानकारी दिए ।
००००
सरकारले जाजरकोट भूकम्पबाट प्रभावितलाई घर बनाउन ३ लाख रूपैयाँभन्दा बढी आर्थिक सहयोग उपलब्ध गराउने भएको छ । भूकम्पछि आइतबार बिहान सिंहदरबारमा बसेको मन्त्रिपरिषद् बैठकले २०७२ सालको भूकम्पपछि प्रभावितलाई घर बनाउन दिइएको ३ लाखमा यसपटक वृद्धि गर्ने घोषणा गरेको हो । 

तर भूकम्पपछिको पुनर्निर्माणको लागि सरकारले आर्थिक सहयोगको घोषणा केही समयपछि मात्रै गर्ने स्वास्थ्य तथा जनसंख्या मन्त्री मोहन बस्नेतले बताए । यस्तै सरकारले मृतकका परिवारलाई २ लाख दिने भएको छ ।
सरकारले जाजरकोट भूकम्पमा परेर घाइते भएकाहरूको उपचार निःशुल्क गर्ने भएको छ ।
००००
शुक्रबारको शक्तिशाली भूकम्पमा परी ज्यान गुमाएकाहरुको आइतबार सामूहिक दाहसंस्कार गरिएको छ ।  जाजरकोटको नलगाड नगरपालिका–१ चिउरी गाउँका १३ जनाको सामूहिक दाहसंस्कार गरिएको हो ।
००००
सरकारले सामाजिक सञ्जालको दुरुपयोग रोक्नका लागि त्यस्ता सामग्री स्वतः हट्ने व्यवस्था गर्ने भएको छ । गृहमन्त्रालयले आइतवार एक विज्ञप्ति जारी गर्दै यस बारेमा गत शुक्रवार मन्त्रालयमा छलफलसमेत भएको जनाएको छ ।
००००
भूकम्पबाट प्रभावित क्षेत्रका घाइतेलाई नेपाल वायु सेवा निगमको जहाजले निस्शुल्क उद्धार गरेको छ । शनिवार बिहानै काठमाडौंबाट रुकुम गएको ‘नाइन एन, एबीटी’ कलसाइनको ट्वीनअटर विमानले घाइतेलाई नेपालगन्ज र काठमाडौंसम्म उद्धार गरेको हो । 
००००
राजनीतिक दलका नेताहरूविरुद्ध आक्रामक अभिव्यक्ति दिँदै आएका मेडिकल कलेज सञ्चालक दुर्गा प्रसाईसँग नेपाल प्रहरीको साइबर ब्यूरोले सोधपुछ गरेको छ ।
००००
परराष्ट्रमन्त्री नारायणप्रकाश साउदले आफ्नो संयुक्त राज्य अमेरिकाको औपचारिक भ्रमण फलदायी भएको बताएका छन् । 
अमेरिका भ्रमण पूरा गरी आइतबार साँझ स्वदेश फर्केपछि अन्तर्राष्ट्रिय विमानस्थल सञ्चारकर्र्मीसँग कुरा गर्दै मन्त्री साउदले आफ्नो भ्रमण नेपाल–अमेरिका सम्बन्धलाई थप उचाइमा र्पुयाउन सफल भएको बताए ।
००००
टी–२० विश्वकप एसिया क्षेत्र अन्तिम छनोटमा नेपालका तीब्रगतिका बलर तथा अलराउन्डर गुल्शन झा उत्कृष्ट युवा खेलाडी घोषित भएका छन् । 

कीर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा भएको अन्तिम खेलमा नेपाल सुपर ओभरमा पराजित भए पनि नेपाली खेलाडी झाले उक्त अवार्ड पाएका हुन् । गुल्शनले विश्वकप एसिया क्षेत्र छनोट खेलमा पाँच खेल खेलेका थिए ।
००००
मंसिरको दोस्रो साताका लागि निर्धारण भएको नेपाली कांग्रेसको महासमिति बैठक सरेको छ ।
सभापति शेरबहादुर देउवाको धुम्बाराहीस्थित निवासमा आइतवार बिहान बसेको केन्द्रीय कार्यसम्पादन समितिको बैठकले महासमिति बैठकको मिति परिवर्तन गरेको हो ।