अख्तियार दुरुपयोग अनुसन्धान आयोगले  सप्तरीको  रुपनी गाउँपालिकाका तत्कालीन प्रमुख प्रशासकीय अधिकृत अरविन्दकुमार चौधरीसहित ५ जनाविरुद्ध भ्रष्टाचार मुद्दा दायर गरेको छ ।

चौधरीका अलावा लेखा अधिकृत श्यामसुन्दर यादव, माध्यमिक तहका शिक्षक श्यामप्रसाद यादव, नायब सुब्बा सुजन दाहाल र लक्ष्मी ट्रेडर्स एन्ड सप्लायर्स राजविराजकी प्रोप्राइटर ललिताकुमारी साहविरुद्ध बिहीबार विशेष अदालतमा मुद्दा दायर गरिएको हो ।

अख्तियारका प्रवक्ता नरहरि घिमिरेका अनुसार ९ लाख ११ हजार ९२५ रुपैयाँमा जस्मिन हाइजिन प्रोड्रक्ट प्रा.लि. मोरङद्वारा उत्पादित स्यानिटरी प्याडलाई लागत अनुमान नै तयार नगरी १७ लाख ८५ हजार ९२८ रुपैयाँमा खरिद गरेको पाइएको छ ।

८ लाख ७४ हजार ३ रुपैयाँ  बराबरको रकम अस्वाभाविक रूपमा बढी तिरेको पाइएपछि विशेष अदालतमा भ्रष्टाचार मुद्दा दायर गरिएको अख्तियारको विज्ञप्तिमा उल्लेख छ ।