राष्ट्रिय सतर्कता केन्द्रले आज दुई मन्त्रालय र दुई विभागमा गरेको छड्के अनुगमनमा ७८ जना कर्मचारी अनुपस्थित रहेको तथा ७१ जना कर्मचारी समयभन्दा ढिला पुगेको पाइएको छ ।

केन्द्रका उपसचिव हिरामणि सुवेदीका अनुसार ५३ जना कर्मचारी सीट छड्के (हाजिरी गरेर हिँडेको) र २० जना कर्मचारी तोकिएको पोशाक नलगाई कार्यालय आएको पाइएको थियो ।

बिहीबार संघीय मामिला तथा सामान्य प्रशासन मन्त्रालयमा ४२ जना अनुपस्थित, ४८ जना सीट छड्के र २५ जना समय (सवा १० बजे) भन्दा ढिला पुगेको तथा १८ जनाले पोशाक नलगाएको पाइयो ।

त्यसैगरी भौतिक पूर्वाधार तथा यातायात मन्त्रालयमा ३६ जना अनुपस्थित, ५ जना सीट छड्के, १७  जना समयभन्दा ढिला पुगेको तथा १८ जनाले पोशाक नलगाएको पाइएको राष्ट्रिय सतर्कता केन्द्रले जनाएको छ ।

त्यसैगरी शहरी विकास तथा भवन निर्माण विभागमा १८ जना समयभन्दा ढिला पुगेको पाइएको थियो ।

पुरातत्व विभागमा ११ समयभन्दा ढिला पुगेका थिए भने २ जनाले पोशाक लगाएका थिएनन् ।

बिदा स्वीकृति नगराई अनि कार्यालय प्रमुखलाई जानकारी नदिई अनुपस्थित भएकाहरूलाई अनुपस्थितका रूपमा गणना गरिएको केन्द्रका सचिव रामआधार साहले बताए ।