सिरहाको तत्कालीन राजपुर गाउँ विकास समिति (गाविस)का सचिव केशव घिमिरे भ्रष्टाचार मुद्दा दोषी ठहर भएका छन् ।

उनलाई बुधवार विशेष अदालतले दोषी ठहर गरेको हो । उनको सजाय निर्धारण गर्न माघ २२ गतेका लागि पेशी तोकिएको विशेष अदालतका प्रवक्ता धनबहादुर कार्कीले लोकान्तरलाई जानकारी दिए ।

अख्तियार दुरुपयोग अनुसन्धान आयोगले आर्थिक हिनामिना गरेको आरोपमा घिमिरेविरुद्ध विशेष अदालतमा मुद्दा दायर गरेको थियो ।

आन्तरिक आय तथा सामाजिक सुरक्षा भत्ता बापतको करिब २५ लाख रुपैयाँ हिनामिना गरेको आरोपमा अख्तियारले सचिव घिमिरेसहित तीन जनाविरुद्ध मुद्दा दायर गरेको हो ।

अन्य दुईजना अरुण शाह र शिवजी कामतीले भने सफाइ पाएका छन् ।