आईसीसी यू–१९ क्रिकेट विश्वकप प्रतियोगिताको सुपर सिक्सअन्तर्गत शुक्रवारको खेलमा नेपाल भारतसँग १३२ रनको भारी अन्तरले पराजित भएको छ । दक्षिण अफ्रिकाको माङ्गाउगं ओभल क्रिकेट मैदानमा भएको खेलमा जीतका लागि २९८ रनको लक्ष्य पाएको नेपालले निर्धारित ५० ओभरमा ९ विकेट गुमाउँदै १६५ रन मात्रै बनाउन सक्यो । 

नेपालका लागि कप्तान देव खनालले अर्धशतकीय पारी खेल्दै ५३ बलमा दुई चौकासहित ३३ रन बनाए पनि त्यो आफ्नो टोलीको जीतका लागि पर्याप्त भएन । यस्तै दुर्गेश गुप्ताले अविजित २९ जोडे ।  साथै ओपनरद्वय अर्जुन कुमालले २६ र दीपक बोहराले २२ रन बनाए भने आकाश चन्दले १८ रनको योगदान दिए । अन्य ब्याटरले भने उल्लेख्य रन बनाउन सकेनन् ।

भारतको जीतमा सौम्य पाण्डेले चार र असरिन कुलकर्णीले समान २ विकेट लिए । साथै राज लिम्बानी, आराध्य शुक्ला र मुरुगन अभिशेकले १–१ विकेट हात पारे ।

त्यसअघि टस जितेर पहिले ब्याटिङ रोजेको भारतले निर्धारित ५० ओभरमा ५ विकेट गुमाउँदै २९७ रनको योगफल बनाएको थियो । उसका लागि सचिन दासले सर्वाधिक ११६ रनको शतकीय योगदान दिए । उनले १०१ बलमा ११ चौका र ३ छक्का प्रहार गरे । कप्तान उदय सहरानले १०७ बलमा ९ चौकाको सहायताले १०० रनको शतकीय पारी खेले ।

त्यसैगरी आदर्श सिहले २१ रन बनाउँदा प्रियान्सु मोलियाले १९ तथा अर्सिन कुलकर्नीले १८ रन जोडे । मुसहिर खानले अविजित ९ रन बनाए ।

नेपालका लागि गुल्शन झाले ३ विकेट लिए भने आकाश चन्दले १ विकेट झारे ।

हारसँगै नेपालले सुपर सिक्स चरणमा विनाअंक यात्रा समाप्त गरेको छ । समूह चरणमा न्युजिल्यान्ड र पाकिस्तानविरुद्ध हार ब्यहोरेको नेपाल तेस्रो खेलमा अफगानिस्तानलाई‌ हराउँदै सुपर सिक्समा पुग्न सफल भएको थियो । सुपर सिक्सको पहिलो खेलमा पनि नेपाल बंगलादेशसँग पराजित भएको थियो ।