राष्ट्रिय स्वतन्त्र पार्टी (रास्वपा) का सांसद स्वर्णिम वाग्लेले सत्ता राजनीतिको खेलमा च्याप्प समाएर प्रधानमन्त्री र मन्त्री बनाउँछन् भनेर भागेर हिँड्ने अवस्था आएको बताएका छन् ।

प्रधानमन्त्री पुष्पकमल दाहाल 'प्रचण्ड'ले बुधवार प्रतिनिधि सभामा विश्वासको मत लिने छलफलमा भाग लिँदै वाग्लेले कांग्रेसबाट यस्तो अफर आएको दाबी गरेका हुन् ।

‘गृहमन्त्री हुँदा नै नैतिकता खोज्नेहरू छन् । तर च्याप्प समाएर प्रधानमन्त्री र मन्त्री बनाइदेलान् भनेर भागी-भागी हिड्नुपरेको छ’, वाग्लेले भने । 

कांग्रेसबाट आफ्ना सभापति रवि लामिछानेलाई प्रधानमन्त्रीको प्रस्ताव आएकोतर्फ संकेत गर्दै वाग्लेले यस्तो दाबी गरेका हुन् । 

विपक्षीमा बस्ने तयारी भए पनि प्रधानमन्त्रीको केही नतिजा दिने हुटहुटीले यसपटक फेरि रास्वपाका सरकारमा सहभागी भएको उनले बताए ।