३१ असार २०८३, बुधबार
प्रमुख प्रतिपक्षी दल नेपाली कांग्रेसले सहकारी ठगीमा जोडिएका रवि लामिछानेलाई गृहमन्त्रीका रूपमा जिम्मेवारी दिइएकोबारे प्रधानमन्त्री पुष्पकमल दाहाल 'प्रचण्ड'सँग जवाफ माग गरेको छ ।
रविलाई गृहमन्त्री बनाउँदा सहकारी ठगीको अनुसन्धान प्रभावित हुने कांग्रेसको चिन्ता छ ।
बिहीबार बसेको प्रतिनिधि सभा बैठकको आकस्मिक समयमा कांग्रेस सहमहामन्त्री बद्री पाण्डेले संसद्को अगामी बैठकमा प्रधानमन्त्रीको जवाफ नआए कांग्रेस कडा रूपमा प्रस्तुत हुने चेतावनी दिए ।
प्रतिनिधि सभा बैठकको कार्यसूचीमा विनियोजन विधेयकका सिद्धान्तमाथि छलफल गर्ने कार्यसूची रहेकाले बिहीबारको बैठक चल्न दिने उनले बताए ।
सहकारी ठगीमा मुछिएका लामिछानेलाई गृहमन्त्रीको जिम्मेवारी दिइएकोबारे कांग्रेसले बुधवार पनि संसद्मा आवाज उठाएको थियो ।
‘अनुसन्धानमा रहेका व्यक्तिलाई गृहमन्त्री बनाइएको सम्बन्धमा हिजो कांग्रेस महामन्त्री, अन्य दलका नेता र कांग्रेस सचेकतले उठाएको विषयमा प्रधानमन्त्रीको मौनताप्रति हामी गम्भीर भएका छौं,’ पाण्डेले भने ।
प्रतिनिधि सभाका यसअघिका बैठकमा प्रतिपक्षी दलले विवादमा मुछिएका मन्त्रीको राजीनामा माग गर्दै प्रधानमन्त्रीको जवाफ माग गरिएको प्रसंग कोट्याउँदै उनले प्रधानमन्त्रीको जवाफका लागि सभामुखसँग रुलिङ माग गरे ।
लगत्तै सभामुख देवराज घिमिरेले सदनमा उठेका विषयमा आफ्नो ध्यानाकर्षण भएको र सरकारले तदनुरूप लिने विश्वास व्यक्त गरे ।
