पाहुना टोली भुटानको रोयल थिम्पू फूटबल क्लब (आरटी एफसी)ले विभागीय टीम नेपाल पुलिस क्बललाई हराउँदै विराटनगरमा बिहीबारदेखि शुरू भएको आठौं संस्करणको विराट गोल्डकप फूटबल प्रतियोगिताको क्वार्टरफाइनलमा प्रवेश गरेको छ ।  

विराटनगरको सहिद रंगशालामा फ्लडलाइटको माध्यमबाट भएको रात्रीकालिन गोल्डकपको उद्घाटन खेलमा पुलिसलाई ३–० गोलअन्तरले हराउँदै आरटी एफसीले अन्तिम आठको स्थान सुरक्षित गरेको हो । 

आरटी एफसीका किन्ले ग्यालसेन, किन्जाङ तेन्जिङ र सिद्धार्थ गुरूङले समान १–१ गोल गरे । 

पहिलो हाफको ३६ औँ मिनेटमा  केल्जाङ जिग्मेले गरेको कर्नर प्रहार किन्ले टच गर्दामा गोलमा परिणत भयो । अग्रता लिएको ४ मिनेट बित्न नपाउँदै पुलिसको कमजोर डिफेन्सको फाइदा उठाउँदै किन्लेले ४० औँ मिनेटमा मध्यभागबाट निकालिदिएको पास किन्जाङले आकर्षक गोल गरी अग्रता दोब्बर बनाए । खेलको ६३ औँ मिनेटमा सिद्धार्थ गुरुङले मैदानको मध्यभागबाट पुलिसका खेलाडीलाई छक्याउँदै डिबक्स भित्रबाट गरेको प्रहार गोलमा परिणत भयो । यससँगै उनले टोलीको जीत सुनिश्चित गरे । 

पहिलो हाफमा २ गोल खाएपछि दबाबमा परेको पुलिसले दोस्रो हाफदेखि आक्रमक खेल पस्कियो । आफ्ना खेलाडीले गोल गर्ने सुन्दर अवसर चुकाउँदा तीन पटकको विराट गोल्डकपको च्याम्पियन टीम पहिलो खेलबाटै बाहिरन बाध्य भएको छ ।

खेलको ७ औँ​ मिनटेमा पुलिसका सञ्जीव लामाको फ्रिकिक प्रहार बाहिरियो । १७ औ मिनेटमा उज्जल राईको डिबक्स भित्रबाट सेकेन्ड बार च्यापेर गरेको प्रहार पनि बारमा लागेर फर्कियो । खेलको ३१ औँ मिनेटमा प्रवीण थापाले डिबक्स भित्रबाट गरेको कडा प्रहारसमेत बाहिरिएका थियो । खेलको ३७ औं मिनेटमा पुलिसका शिशिर चौधरीले गरेको हेडिङ प्रहार फ्रेममा पर्न सकेन । 

यता ४० औं मिनेटमा आरटी एफसीका किन्ले गेतसनको प्रहार पोस्ट माथिबाट गयो । ७० औं मिनेटमा पुलिसको अनुराग लामिछानेको कडा प्रहार बारमाथिबाट जाँदा पुलिसले सान्त्वना गर्नबाट चुकेको थियो ।

पुलिसका प्रशिक्षक चेतन घिमिरेले नयाँ खेलाडीहरू भएकोले नतिजा आफ्नो पक्षमा आउन नसकेको बताए । ‘हाम्रा खेलाडीले राम्रै प्रर्दशन गरेका थिए । तरपनि नतिजा आफ्नो पक्षमा आउन सकेन । यसमा दुःखी छैनौं,’ उनले भने ।

‘ए’ डिभिजन लिगका लागि नयाँ खेलाडी तयार गरिएको प्रशिक्षक घिमिरेले बताए । अब सिमरा गोल्डकप र कपिलबस्तुको गोल्डपको तयारीमा लाग्ने उनले जानकारी दिए । 

यता जीतपछि भुटानका प्रशिक्षक उगेन दोर्जेलेले खेलाडीले राम्रो प्रर्दशन गरेका कारण फराकिलो जीत हासिल गरेको बताए । ‘पहिलो हाफमा २ गोल गरेर दबाब कायम गर्न सफल भयौ,’ उनले भने, ‘दोस्रो हाफमा पनि खेलाडीले राम्रो प्रर्दशन गरे । यसले गर्दा नतिजा हाम्रो पक्षमा आएको छ ।’

खेलको प्लेयर अफ द म्याच भुटानका किन्जाङ तेन्जिङ घोषित भए । उनले नगद ११ हजार रुपैयाँ पाए । 

शुक्रवारको खेल त्रिभुवन आर्मी क्लब र न्युरोड टीम (एनआरटी) काठमाडौंबीच हुनेछ । 

चैत २४ गतेसम्म सञ्चालन हुने प्रतियोगितामा विदेशी तीन र स्वदेशी ‘ए’ डिभिजनका ७ गरी १० टोली को सहभागी छन् । 

गोल्डकपका विजेताले ११ लाख र उपविजेताले ५ लाख ५० हजार रुपैयाँ पाउनेछन् । उत्कृष्ट प्रशिक्षक, उत्कृष्ट गोलरक्षक र सर्वाधिक गोलकर्तालाई जनही २१ हजार रुपैयाँ पुरस्कार प्रदान गरिने छ । सर्वोत्कृष्ट खेलाडीलाई मोटरसाइकल दिने आयोजकले जनाएका छन् ।