भिटामिन डी शरीरका लागि अत्यन्त आवश्यक पोषक तत्व हो, जसले शरीरका विभिन्न कार्यहरूलाई सहज बनाउन मद्दत गर्छ। प्रायः उमेर बढेसँगै मानिसहरूलाई भिटामिन डीको समस्या देखिन थाल्छ। भिटामिन डीको कमी हुनुको मुख्य कारण हो खानपान र सूर्यको प्रकाशबाट पर्याप्त भिटामिन नपाउनु। 

भिटामिन डीले शरीरमा क्याल्सियमको कमी पूर्ति गर्नुका साथै हड्डी बलियो बनाउने र प्रतिरोधी क्षमता सुधार्ने काम गर्छ। तर, अहिले धेरैजसो मानिसमा भिटामिन डीको कमी हुने समस्या देखा परिरहेको छ । 

शरीरमा भिटामिन डीको कमी भयो यसले रिकेट्स, अस्टियोपोरोसिस र अन्य धेरै स्वास्थ्य समस्याहरू निम्त्याउन सक्छ। त्यसैले, समयमै आफ्नो भिटामिन डीको स्तर जाँच गर्न र यसको कमीका प्रारम्भिक संकेतहरूलाई चिन्न महत्त्वपूर्ण हुन्छ। यहाँ भिटामिन डीको कमीका केही लक्षणहरू उल्लेख गरिएका छन्:

थकान
यदि तपाईंलाई भिटामिन डीको कमी छ भने, राम्रो निद्रा लिए पनि तपाईं थकित र कमजोर महसुस गर्न सक्नुहुन्छ। भिटामिन डीले निद्रा-चक्रलाई पनि प्रभावित गर्न सक्छ, जसका कारण तपाईंलाई बारम्बार थकावट हुने समस्या देखिन्छ।

मनस्थिति परिवर्तन
भिटामिन डीको कमी हुँदा डिप्रेशन, चिन्ता र झर्को लाग्ने समस्या बढ्न सक्छ। भिटामिन डी सेरोटोनिन उत्पादनसँग सम्बन्धित हुन्छ। यसको कमी हुँदा डिप्रेशन र अन्य मनोवैज्ञानिक विकारहरू देखिन सक्छन्।

हड्डी दुखाइ
भिटामिन डीले शरीरमा क्याल्सियम अवशोषणमा मद्दत गर्छ। जब यसको कमी हुन्छ, यो प्रक्रिया प्रभावित हुन्छ, जसले गर्दा हड्डीहरू कमजोर हुने र दुख्ने समस्या उत्पन्न हुन्छ।

कपाल झर्नु
भिटामिन डीको कमीले कपालका रोमहरूलाई कमजोर बनाउँछ, जसका कारण कपाल झर्ने समस्या देखिन्छ। यसले गर्दा कपाल पातलो हुने समस्या पनि उत्पन्न हुन्छ।

घाउ चाँडै नभरिनु
भिटामिन डीको कमीको अर्को संकेत हो घाउ चाँडै नभरिनु। भिटामिन डीले संक्रमणसँग लड्न सहयोग गर्छ। यसको कमी हुँदा शरीरको घाउ निको पार्ने प्रक्रिया सुस्त हुन्छ।

मांशपेशीको समस्या
भिटामिन डीको कमीले मांशपेशीहरूको कार्यप्रणालीमा असर पुर्‍याउन सक्छ। यसले शरीरमा क्याल्सियमको अवशोषणलाई प्रभावित गर्छ, जसका कारण मांशपेशी कमजोर हुने र ऐंठनको समस्या देखिन्छ।

स्वस्थ जीवनशैली अपनाउँदै खानपान र सूर्यको प्रकाशबाट पर्याप्त भिटामिन डी लिनुहोस्। यदि माथि उल्लेख गरिएका लक्षणहरू देखिए भने चिकित्सकसँग परामर्श गर्नुहोस्।