०२ असार २०८३, मंगलबार
वैदेशिक रोजगारमा यूके र दुबई पठाउने भनेर ठगी गरेको आरोपमा प्रहरीले दुई जनालाई पक्राउ गरेको छ ।
पक्राउ पर्नेमा तनहुँको बन्दीपुर नगरपालिका-२ घर भई काठमाडौं महानगरपालिका-२६ बस्ने २३ वर्षीया सन्जिता गुरुङ र तनहुँकै भिमाद नगरपालिका-१ घर भई काठमाडौं महानगरपालिका-६ बौद्ध बस्ने ५० वर्षीय रेशम राज लामिछाने छन् ।
प्रहरीको काठमाडौं उपत्यका अपराध अनुसन्धान कार्यालयको टोलीले उनीहरूलाई काठमाडौंका विभिन्न स्थानबाट पक्राउ गरेको हो ।
गुरुङले यूके पठाउने भन्दै २ जना व्यक्तिबाट ६० लाख ८९ हजार रकम ठगी गरेको प्रहरीले जनाएको छ । यस्तै, लामिछानेले दुबई पठाउने भन्दै ११ जनाबाट २४ लाख ठगी गरेको प्रहरीले जनाएको छ ।
उनीहरूलाई विदेश नपठाई सम्पर्कविहीन भएपछि पीडितहरूले प्रहरीमा जाहेरी दिएका थिए । पीडितको जाहेरीपछि प्रहरीले उनीहरूलाई पक्राउ गरेको छ ।
पक्राउ परेकाहरूलाई थप अनुसन्धान तथा कारबाहीका लागि वैदेशिक रोजगार विभाग ताहाचल, पठाइएको अपराध अनुसन्धान कार्यालयका सूचना अधिकारी, एसपी काजी कुमार आचार्यले जानकारी दिए ।
