२२ असार २०८३, सोमबार
काठमाडौंको बूढानीलकण्ठ नगरपालिका–३ स्थित अनलाइन जुवा अखडामा प्रहरीले छापा मारेर २३ जनालाई पक्राउ गरेको छ ।
उनीहरूको साथबाट प्रहरीले ८८ वटा मोबाइल र १० ल्यापटप बरामद गरेको जनाएको छ । बरामद मोबाइल र ल्यापटपमा फेला परेका तथ्य केलाउने काम भइरहेको जिल्ला प्रहरी परिसर काठमाडौंका प्रमुख, एसएसपी विश्व अधिकारीले जानकारी दिए ।
उनका अनुसार गोप्य सूचनाका आधारमा आइतबार राति स्थानीय दोर्जी लामाको दुई तले घरमा अनलाइन जुवा सञ्चालन गरिरहेको अवस्थामा भारतीय नागरिकलाई पक्राउ गरिएको थियो । अनलाइन जुवा सञ्चालकले उनीहरू सो घरमा खाने र बस्ने सुविधा प्रदान गर्दै आएका थिए ।
अनुसन्धानमा संलग्न प्रहरीका अनुसार प्रारम्भिक अनुसन्धानमा यो गिरोहले हालसम्म करिब ३ अर्बको कारोबार गरेको मोबाइल र ल्यापटपमा फेला परेको तथ्यले देखाएको छ ।
एसएसपी अधिकारीले भने, ‘बरामद गरिएका मोबाइल र ल्यापटपमा भेटिएका तथ्यहरू केलाउने काम भइरहेको छ, यो विशुद्ध अनलाइन जुवाका लागि प्रयोग भएको देखिन्छ । हामी अनुसन्धानमै छौं ।’
