२२ असार २०८३, सोमबार
भिजिट भिसा प्रकरणमा गृहमन्त्री रमेश लेखकको राजीनामा माग गर्दै विपक्षी दलले अवरोध गरेको संसद् बैठक खुलाउन सभामुख देवराज घिमिरेले पहल थालेका छन् । सभामुख घिमिरेले बुधबार मध्यान्ह बानेश्वरस्थित संसद् भवनमा रहेको कार्यकक्षमा सभामुखले दलहरूसँग छलफल गरेका हुन् ।
गृहमन्त्रीको राजीनामालाई बटमलाइन बनाएका विपक्षी दल र कुनै हालतमा राजीनामा नगर्ने सत्तापक्षको अडानका कारण संसद बैठक बस्न ढिलाइ भएको हो । सत्तापक्षले संसदमा गृहमन्त्री लेखकलाई सम्वोधन गर्न दिन माग गरेको छ।
सभामुखको कार्यकक्षमा जारी छलफलमा नेपाली कांग्रेस, नेकपा एमाले, माओवादी केन्द्र, रास्वपा र राप्रपाका प्रमुख सचेतक सहभागी छन् ।
गृहमन्त्रीको राजीनामा माग गर्दै विपक्षी दलले अवरोध गरेपछि मंगलबारको प्रतिनिधिसभा बैठक सूचना टाँसेर स्थगित भएको थियो ।
बुधबारको बैठकमा अर्थमन्त्रीले आर्थिक सर्वेक्षण पेश गर्ने कार्यसूची छ ।
गृहमन्त्रीको राजीनामा माग गर्दै संसद् अवरोध गरेका विपक्षी दलहरू पनि छलफलमा जुटेका छन् । जेठ १५ गते संसदमा बजेट ल्याउनु पर्ने संवैधानिक बाध्यता रहेकोले त्यसबारे धारणा बनाउन विपक्षी दलहरू पनि छलफलमा जुटेका हुन् ।
बिहीवार अपरान्ह बस्ने संघीय संसद्को संयुक्त बैठकमा अर्थमन्त्री विष्णु पौडेलले नयाँ आर्थिक वर्ष २०८२/०८३ का लागि नयाँ बजेट पेश गर्ने कार्यक्रम छ ।
विपक्षी दलले अवरोध गरे मार्सल लगाएर भएपनि बजेट पेश गर्ने निचोडमा सत्तारुढ दल पुगेका छन् ।
