पोखराको सूर्यदर्शन बचत तथा ऋण सहकारी ठगी प्रकरणमा पूर्वअध्यक्ष ज्ञानबहादुर बम्जन १० लाख रुपैयाँ धरौटीमा छुटेका छन् । बम्जन सहकारी ठगी प्रकरणका मुख्य योजनाकार गितेन्द्रबाबु (जीबी) राईका जेठान हुन् । 

 सहकारी ठगी अभियोगमा पक्राउ पुर्जी जारी भएपछि लामो समय फरार रहेका बम्जन आइतबार कास्की जिल्ला अदालतमा उपस्थित भएर बयान दिएका थिए । न्यायाधीश शंकरकुमार राईको इजलासमा भएको बयानपछि अदालतले १० लाख धरौटी तोकेपछि उनी रकम बुझाएर छुटेको सूचना अधिकारी दामोदर आचार्यले जानकारी दिए ।

२०६५ सालमा पोखरामा सूर्यदर्शन सहकारी दर्ता गर्न उनी सक्रिय भएका थिए । सहकारी विस्तारमा बम्जन परिवारको संलग्नता थियो  ।

उनमाथि व्यक्तिगत रूपमा २६ लाख ७० हजार रुपैयाँभन्दा बढी ठगी गरेको अभियोग छ भने अध्यक्ष हुँदा संस्थागत रुपमा करिब १ करोड ५४ लाख रुपैयाँ अपचलन गरेको आरोप छ । पछिल्लो समयमा सहकारी ठगी प्रकरणमा जीबी राईसहित ६३ जनाविरुद्ध मुद्दा दायर भइसकेको छ । सोही प्रकरणमा यसअघि राष्ट्रिय स्वतन्त्र पार्टीका सभापति रवि लामिछाने पनि ६५ लाख धरौटीमा रिहा भएका थिए ।