०७ साउन २०८३, बिहीबार
विराटनगर– साउन महिनाको पहिलो हप्तादेखि नै माटोको मूर्ति बनाउन व्यस्त भएका कलाकारलाई आजको दिन थप भ्याइँ–नभ्याइँ छ ।
आइतवार कृष्ण जन्माष्टमी भएका कारण राति १२ बजेसम्म कलाकारहरू कृष्ण भगवानको मूर्ति सिँगार्न व्यस्त छन् । साउन महिनादेखि नै नेपाली हिन्दू धर्मालम्वीको चाड पनि शुरू हुन्छ । चाड पर्व शुरू भएसँगै विराटनगरमा रहेका अधिकांश मूर्तिकार व्यस्त छन् ।
विराटनगर महानगरपालिका–१३ सैनिक टोलका ४१ वर्षीय विजय महतो विगत २६ वर्षदेखि माटोका मूर्ति बनाउने पेशामा संलग्न छन् । विजयलाई आइतवार श्रीकृष्ण भगवानको मूर्ति सजाउन भ्याइँ–नभ्याइँ छ । उनले काम गर्ने ६ जना मजदुर पनि राखेका छन् । दैनिक ४ देखि ६ सय रुपैयाँसम्म ज्यालादारी दिएर माटोको मूर्ति बनाउन राखेका छन् ।
महतो भन्छन्, ‘साउनको महिना लाग्नासाथ मूर्ति बनाउनको लागि धेरै नै माग आए, यसपालिको कृष्ण जन्माष्टमीको लागि ६५ वटा मूर्तिको अडर आएको छ । आइतवार बेलुकीसम्म सबै तयारी गरिसक्नुपर्छ ।’
उनले बनाएको मूर्ति १ हजारदेखि ११ हजार रुपैयाँसम्मका रहेका छन् । १ सिजनमा ४० देखि ५० हजार रुपैयाँसम्म फाइदा हुने उनले बताए । विराटनगर–१३ कै प्रेम महतो पनि यस पटक ७३ वटा माटोका मूर्ति बनाएका छन् । उनले तयार पारेको मूर्ति सबै तयार भइसकेका छन् । ५ हजारमा २ ट्याक्टर माटो किनेर उनले यसपालि ७३ वटा कृष्ण भगवानको मूर्ति तयार पारेका छन् ।
उनको १ हजारदेखि ९ हजार रुपैयाँसम्मको मूर्ति अर्डर आएको सुनाए । मूर्ति बनाउन उनले भारतबाट सामान लिएर आउने गरेका छन् । यसपालि मूर्ति बनाउनको लागि शृंगारका सामानमा धेरै कर बढाएर आफूहरूलाई समस्यामा परेको बताए ।
विराटनगरको दक्षिणी क्षेत्र सैनिक टोल उत्तरी तीनपैनी, बरगाछी, हाटखोला क्षेत्रमा रहेका मूर्तिकार यतिबेला मूर्ति बनाउन कलाकार लागिपरेको छन् । कृष्ण जन्माष्टमी, विश्वकर्मा पूजा, दूर्गा पूजा, आनन्द पूजा, छैठ तथा फागुनको अन्तमा सरस्वती माताको मूर्ति बनाउने काम कलाकारले गर्दै आएका छन् । उनीहरूको वार्षिक कमाइ २ लाख रुपैयाँसम्म हुने गरेको छ ।
