२३ जेठ २०८३, शनिबार
काठमाडौं– ताप्लेजुङमा भएको हेलिकप्टर दुर्घटनामा परी निधन भएका संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सातै जनाको पार्थिव शरीर श्रद्धाञ्जलिका लागि काठमाडौंको टुँडिखेलमा राखिएको छ ।
अन्तिम श्रद्धाञ्जलि दिन आफन्त, राजनीतिक दलका नेता तथा कार्यकर्ता, सरकारी अधिकारी, सर्वसाधारण टुँडिखेल आउने क्रम शुरु भएको छ । श्रद्धाञ्जलिका लागि बिहान ११ बजेसम्म टुँडिखेलमा राखिने छ । श्रद्धाञ्जलिका लागि राष्ट्रपति विद्यादेवी भण्डारी, उपराष्ट्रपति नन्दबहादुर पुन, उपप्रधानमन्त्री, मन्त्रीलगायत विशिष्ट व्यक्ति आउने नेकपाले जनाएको छ । प्रधानमन्त्री केपी शर्मा ओली टुँडिखेल पुगिसकेका छन् ।
मन्त्री अधिकारीको आजै पोखरामा दाहसंस्कार गर्ने तयारी भएको छ । उनको राजकिय सम्मानका साथ अन्त्यष्टि गरिने सरकारले यसअघि नै जनाइसकेको छ ।
काठमाडौँबाट तेह्रथुमको चुहानडाँडामा विमानस्थलको सम्भाव्यता अध्ययनका लागि मन्त्री अधिकारीसहितको टोली कार्यक्रम सकेर पाथीभरा हुँदै काठमाडौँ फर्किने क्रममा बुधबार ताप्लेजुङको दारेभिरमा हेलिकप्टर दुर्घटनामा परेको थियो ।
दुर्घटनामा मन्त्री अधिकारी, यति एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक धु्रव भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकप्टरका क्याप्टेन प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको निधन भएको थियो ।
