काठमाडौं– सरकारले नेपालको ऊर्जा क्षेत्रमा थप लगानीका लागि जापानी अन्तराष्ट्रिय सहयोग नियोग(जाइका)लाई आग्रह गरेको छ । जाइकाको लगानी रहेको तनहुँ सेती जलविद्युत् आयोजनाले निर्माणको चरणमा प्रवेश गरेको भन्दै सरकारले थप लगानीका जाइकालाई आग्रह गरेको हो ।
कूल १४० मेगावाट क्षमताको तनहुँ सेती जलविद्युत आयोजनामा जाइकाको लगानी रहेको छ । ऊर्जा, जलस्रोत तथा सिँचाइमन्त्री वर्षमान पुन र जाइकाका दक्षिण एशियाली महानिर्देशक हारा सोहेइबीच मंगलवार भएको भेटका क्रममा मन्त्री पुनले उक्त आग्रह गरेका हुन् । 
मन्त्री पुनले नेपालको ऊर्जा क्षेत्रमा जाइकाले पु¥याएको सहयोगको सराहना गर्दै थप लगानीका लागि आग्रह गरे । सरकारले आगामी १० वर्षमा १५ हजार मेगावाट विद्युत् उत्पादन गर्ने लक्ष्य राखेको भन्दै मन्त्री पुनले जाइकालाई थप लगानी गर्न आग्रह गरेका ऊर्जा, जलस्रोत तथा सिँचाइ मन्त्रालयका उपसचिव सागर गौतमले बताए ।
नेपालले पछिल्ला दिनमा चीन, भारत, बङ्गलादेश र अष्ट्रियासँग ऊर्जा सहकार्यका लागि द्विपक्षीय संयन्त्र स्थापना भइसकेको र जापानसँग पनि त्यस्तो संयन्त्र स्थापनाका लागि पहल भइरहेको मन्त्री पुनको भनाई थियो ।
 नेपालको ऊर्जा क्षेत्रमा जापानका निजी क्षेत्रलाई लगानीका लागि जाइकाले अभिप्रेरित गर्न सक्नेतर्फ समेत मन्त्री पुनले जाइकाका प्रतिनिधिमण्डललाई आग्रह गरे ।