काठमाडौंमा जारी १३ औं दक्षिण एसियाली खेलकूद (साग) अन्तर्गतको महिला फुटबलमा आयोजक नेपाल चीरपरिचित प्रतिष्पर्धी भारतसँग पराजित भएको छ ।

पोखरा रंगशालाको फूटबल मैदानमा शनिवार लीग चरणको अन्तिम खेलमा नेपाल भारतसँग १–० गोलअन्तरले पराजित भएको हो । 

लीगको अन्तिम खेलमा स्पर्धा गरेका दुवै टोलीले एक खेलअगावै फाइनलमा स्थान बनाइसकेकाले शनिवारको खेल औपचारिकताका लागि मात्र थियो ।

भारतको जीतमा खेलको पहिलो हाफको १८ औं मिनेटमा एनजी बाला देवीले गरेको एक मात्र गोल निर्णायक बन्यो ।

डेङ्गमी ग्रेनसले प्रहार गरेको ‘कर्नर किक’लाई अनमार्क रहेकी एनजी देवीले हेडमार्फत सेकेण्ड बार च्याप्दै बललाई पोस्टको दिशा दिएकी थिइन् । खेलमा फर्कन कडा मेहनत गरेको नेपालले बराबरीका लागि केही अवसर सिर्जना गरे पनि सदुपयोग गर्न सकेन । नेपालका फरवार्ड सावित्रा भण्डारीलाई विपक्षी खेलाडीले शनिवार खुलेर खेल्ने मौका नै दिएनन् ।

समूह चरणका ३ खेल जितेको भारत ९ अंकसहित समूह विजेता बनेको छ भने नेपाल २ खेलमा जीत र १ खेलमा हारसँगै ६ अंकका साथ समूह उपविजेता बन्यो । नेपाल र भारतले पुनः आगामी मंसिर २३ गते स्वर्ण पदकका लागि स्पर्धा गर्नेछन् ।

खेलपछिको पत्रकार सम्मेलनमा नेपाली टोलीका मुख्य प्रशिक्षक हरि खड्काले विपक्षी टोलीले पाएको कर्नर बल रोक्न नसोक्नु टोलीका लागि दुर्भाग्य भएको बताउँदै फाइनल खेलमा गल्ती कम गर्दै स्वर्णका लागि खेल्ने बताए ।

भारतीय टोलीका प्रशिक्षक मेयामोल रकीले खेलाडीको प्रदर्शनभन्दा पनि खेलको नतिजासँग आफू सन्तुष्ट रहेको बताउँदै खेल अत्यन्त प्रतिष्पर्धापूर्ण रहेको प्रतिक्रिया दिए । महिला फुटबलमा तेस्रो स्थानका लागि शनिवार भएको स्पर्धामा माल्दिभ्सले २–१ गोलअन्तरले श्रीलंकालाई पराजित गर्दै कास्य पदक जितेको छ । 

मंसिर १७ गतेदेखि शुरू भएको महिला फुटबल प्रतियोगितामा आयोजक नेपालसहित भारत, माल्दिभ्स र श्रीलंकाले सहभागिता जनाएका थिए ।