अस्ट्रेलियाको लगातार चौथो जीत : साविक विजेता इंग्ल्याण्ड सुपर आठमा, स्कटल्याण्ड बाहिरियो

आईसीसी टी–२० विश्वकपमा अस्ट्रेलियाले स्कटल्याण्डलाई हराएको छ । आइतबार बिहान सम्पन्न खेलमा स्कटल्यान्डले प्रस्तुत गरेको १ सय ८१ रनको लक्ष्य अस्ट्रेलियाले १९.४ ओभरमा ५ विकेटको क्षतिमा पूरा गर्‍यो । अस्ट्रेलियाको यो लगातार चौथो जीत हो । 

अस्ट्रेलियाको जीत साविक विजेता इंग्ल्यान्डका लागि वरदान साबित भएको छ । नेट रन रेटका आधारमा स्कटल्यान्डलाई पछि पार्दै इंग्ल्यान्ड सुपर ८ मा प्रवेश गरेको छ । दुई टोलीको अंक समान भए पनि इंग्ल्यान्डको रन रेट स्कटल्यान्डभन्दा राम्रो रहेको छ । स्कटल्याण्ड भने बाहिरिएको छ । 

इंग्ल्याण्डले गएराति नामिबियालाई डकवर्थ लुइस नियमअनुसार ४१ रनले पराजित गरेको थियो । समूह चरणका सबै चारै खेल खेलिसकेका इंग्ल्याण्ड र स्कटल्याण्डको समान पाँच/पाँच अंक छ । तर, रन रेटका आधारमा डिफेण्डिङ च्याम्पियन इंग्ल्याण्ड सुपर ८ मा पुगेको हो । 

यसअघि भारत, अस्ट्रेलिया, दक्षिण अफ्रिका, वेस्टइन्डिज, अफगानिस्तान र अमेरिका सुपर-८ मा पुगिसकेका छन् । 

अब बंगलादेश, स्कटल्याण्ड र नेदरल्याण्ड्स सुपर ८ पुग्ने बाटोमा छन् । यीमध्ये दुई टोली सुपर ८ मा पुग्ने छन् । 

यसअघि अघिल्लो टी–२० विश्वकप क्रिकेटको उपाधि इंग्ल्यान्डले जितेको थियो । अष्ट्रेलियाको मेलबर्नस्थित मेलबर्न क्रिकेट ग्राउण्डमा भएको फाइनलमा पाकिस्तानलाई ५ विकेटले हराउँदै सन् २०१० पछि इंग्ल्यान्डले दोस्रोपटक टी–२० विश्वकपको उपाधि उचालेको थियो ।

यसअघि इंग्ल्याण्डले सन् २०१० मा पनि उपाधि जितेको थियो । इंग्ल्याण्डबाहेक सह-आयोजक वेस्ट इन्डिज मात्र दुई पटक टी–२० विश्व च्याम्पियन बनेको छ । 

यसपालि पनि इंग्ल्यान्डसँगै अष्ट्रेलिया र भारत ट्रफी जित्ने ठूलो दाबेदार मानिएको छ ।

सन् २०२१ देखि हालसम्म अष्ट्रेलियाले टी-२० विश्वकप, एकदिवसीय विश्वकप र विश्व टेस्ट च्याम्पियनसिप जितेको छ ।

भारतीय टोलीले सन् २००७ यता टी–२० विश्वकपको उपाधि जित्न सकेको छैन । साथै, सन् २०१३ देखि भारतले अन्य ढाँचामा पनि आईसीसी ट्रफी जित्न सकेको छैन।