धनगढी – वाइडबडी प्रकरणमा पूर्वप्रधानमन्त्री समेत रहेका नेपाली कांग्रेसका सभापति शेरबहादुर देउवाको नाम पनि मुछिएपछि उनी प्रतिरक्षात्मक देखिएका छन् ।

आइतवार धनगढी नेपाल प्रेस युनियन कैलालीले आयोजित पत्रकार सम्मेलनमा सभापति देउवाले आफुलाई नियोजित रुपमा बदनाम गराउन खोजेको दावी गरेका छन् ।

उनले उल्टै वर्तमान पधानमन्त्री केपी शर्मा ओली र नेकपा अध्यक्ष पुष्पकमल दाहाल प्रचण्डको संलग्नता रहेको समेत आरोप लगाएका छन् ।

‘तत्कालीन अवस्थामा मैले प्रधानमन्त्रीसहित १९ वटा मन्त्रालय सम्हालेको थिएँ । तर कुनै निर्णय नभएको अवस्थामा पनि मलाई फसाउन खोजिएको छ । मैले प्रधानमन्त्री हुनुभन्दा अघि नै वाइडबडीका बारेमा धेरै निर्णय भइसकेको थियो,’ उनले भने, ‘वाइडबडी प्रकरणमा प्रधानमन्त्री ओली र पुष्पकमल दाहाल प्रचण्डको नै संलग्नता छ ।’

प्रधानमन्त्री ओली र प्रचण्डकै प्रत्यक्ष संलग्नता रहेको जिकिर गर्दै उनले भने, ‘ओली प्रधानमन्त्री भएको बेला सरकारले नै जहाज खरिदका लागि उपसमिति गठन गरेको र प्रचण्ड प्रधानमन्त्री भएका बेला सरकार जमानत बसेर बोलपत्र खरिद गर्ने निर्णय भएको छ ।’

सभापति देउवाले कांग्रेस छाया सरकर नभई विशेष समिति बनाएर सरकारका काम कारवाहीको मूल्यांकन र निगरानी गर्ने बताए । त्यसका लागि केही व्यक्तिलाई जिम्मेवारी दिने उनको भनाई छ । अहिलको सरकारले कुरा बढी गरेपनि काम गर्न नसेको उनको ठहर छ ।