श्रीलंकाका विलासी होटल र चर्चहरूमा विस्फोट, कम्तीमा ५० जनाको मृत्यु

बैशाख ८, २०७६

काठमाडौं – श्रीलंकाका विलासी होटल र चर्चहरूमा आइतवार शृंखलाबद्ध विस्फोट हुँदा कम्तीमा ५० जना मारिएका छन् भने ईस्टर सर्भिसेजका लागि भेला भएका सयौं भक्तहरू घाइते भएका छन् । 

पहिलो विस्फोटन कोलम्बोस्थित सेन्ट एन्थोनी चर्च अनि नेगोम्बो शहरमा रहेको सेन्ट सेबास्टियन चर्चमा भएको थियो । 


ADVERTISEMENT

कोलम्बो राष्ट्रिय अस्पतालका निर्देशक सामिन्दी सामराकूनले कम्तीमा ५० जनाको मृत्यु र २८० जना घाइते भएको आफूले थाहा पाएको रोयटर्स समाचार संस्थालाई बताइन् । 

सेन्ट एन्थोनीमा भएको विस्फोटमा कम्तीमा १६० जना घाइते भएको र उनीहरूलाई कोलम्बो राष्ट्रिय अस्पतालमा भर्ना गरिएको एक अधिकारीले एएफपी समाचार संस्थालाई बताए । 

विस्फोटनको घटनालगत्तै प्रहरीले कोलम्बोमा रहेका तीनवटा होटलमा पनि विस्फोट भएको र देशको पूर्वी भागमा रहेको बाट्टिकालोआ शहरमा रहेको चर्चमा पनि आक्रमण भएको बताए । 

बाट्टिकालोसा अस्पतालका एक अधिकारीले एएफपीलाई बताएअनुसार, ३०० भन्दा बढी मानिस घाइते भएर अस्पतालमा भर्ना भएका छन् । 

श्रीलंकाका एक सांसद हर्षा डी सिल्भाले आफू एक चर्च र एक होटलमा पुगेको र डरलाग्दा दृश्य देखेको बताए । ‘सबैतिर शरीरका अंगहरू छरिएका थिए । आपतकालीन क्रूहरू घटनास्थलमा उद्धार कार्यमा लागेका छन्,’ उनले ट्विटरमा लेखे । 

सामाजिक सञ्जालमा राखिएका तस्वीरमा एउटा चर्चको छत विस्फोटका कारण लगभग उडेको देखिएको छ । 

श्रीलंकामा बौद्ध धर्मावलम्बीको बहुमत छ र त्यहाँ जम्मा ६ प्रतिशत क्याथोलिक धर्मावलम्बी छन् । तर यो धर्ममा तमिल र अन्य अल्पसंख्यक जातीय समूहहरूपनि जोडिएका छन् ।

घटनाको जिम्मेवारी कसैले लिइसकेको छैन । प्रहरीको अनुसन्धान जारी छ ।

द गार्डियनबाट
 

बैशाख ८, २०७६ मा प्रकाशित

प्रतिक्रिया दिनुहोस