काठमाडौं – गृह मन्त्रालयका प्रवक्ता सहसचिव रामकृण सुवेदीको हस्ताक्षर कीर्ते गरेको अभियोगमा पक्राउ परेका लक्ष्मी अधिकारी दम्पतीले नेपाल राष्ट्र बैंकको समेत कीर्ते गरेको खुलेको छ ।

कीर्ते प्रकरणमा मंगलवार सिंहदरबारको दक्षिणी गेट नजिकबाट बाराको निजगढकी ३३ वर्षीया लक्ष्मी अधिकारी र उनका पति ३८ वर्षीय राजकुमार थापा पक्राउ परेका थिए ।

प्रहरी अनुसन्धानका क्रममा उनले सुवेदीबाहेक अन्य विभिन्न निकायका कागजातमा कीर्ते गर्ने गरेको खुलेको छ । ‘नेपाल राष्ट्र बैंक, अख्तियार दुरुपयोग अनुसन्धान आयोग लगायत विभिन्न मन्त्रालयहरूको पनि कीर्ते गरेको फेला परेको छ,’ गृह मन्त्रालयका एक अधिकारीले लोकान्तरसँग भने ।

लक्ष्मी दम्पतीले कीर्ते गरेका विभिन्न निकायको विस्तृत विवरण संकलन गर्न प्रहरी वृत्त सिंहदरबार खटिएको छ । कीर्तेबारे अनुसन्धान भइरहेको महानगरीय परिसर काठमाडौंका प्रमुख वरिष्ठ प्रहरी उपरीक्षक (एसएसपी) उत्तमराज सुवेदीले लोकान्तरलाई बताए । 

‘कुन–कुन निकाय हो । अहिले खुलिसकेको छैन । अरु पनि कीर्ते गरेका कागजहरू भेटिएका छन् । सबै कुरा खुलेपछि हामी पत्रकार सम्मेलन गर्नेछौं,’ उनले भने ।

गृह मन्त्रालयको नक्कली ‘लेटर प्याड’मा लक्ष्मी अधिकारीको बुवाको मृत्यु नेपाल सरकारका कारणले भएको भनी सहसचिवले प्रमाणित गरेको कीर्ते हस्ताक्षर भएको कागजात प्रहरीले बरामद गरेको थियो ।

कागजातमा क्षतिपूर्ति स्वरुप ९५ करोड रुपैयाँ दिने निर्णय भएको र थप ८ करोड ७६ लाख गरी १ अर्ब ८ करोड ७६ लाख दिने उल्लेख गरिएको थियो । 

अभियुक्तको साथबाट १३ थान बैंकका चेक, विभिन्न व्यक्तिको राहदानी र ४२ हजार २ सय १० रुपैयाँ नगद समेत बरामद भएको थियो ।