.लमजुङमा पहिरोमा एकैघरका ३ जनाको मृत्यु

लमजुङ सदरमुकाम बेशीशहरमा पहिरोमा परी एकै परिवारका ३ जनाको मृत्यु भएको छ । ३ जना घाइते छन् ।

बेशीशहर नगरपालिका–७, सातबिसेमा बिहीबार राति स्थानीय दीपक तामाङको घर पहिरोले पुरिँदा परिवारका ३ जनाको मृत्यु भएको हो । 

लमजुङ प्रहरीका अनुसार मृत्यु हुनेमा ३२ वर्षीय दीपक तामाङ सहित उनकी श्रीमती अन्दाजी २६ वर्षीया वीमाया तामाङ र छोरा ९ वर्षीय छेवाङ तामाङ छन् ।

घाइतेको जिल्ला सामुदायिक अस्पतालमा उपचार भइरहेको छ ।

पोखराको सराङकोट र हेम्जामा पहिरो, ४ जनाको मृत्यु, ६ घाइते

अविरल वर्षापछि आएको पहिरोमा परी पोखराको सराङकोट र हेम्जामा ४ जनाको मृत्यु भएको छ । घटनामा ६ जना घाइते छन् ।

पोखरा महानगरपालिका वडा १८, सराङकोटको गोठादीका टंकबहादुर थापाको घर पहिरोमा पर्दा ३ जनाको मृत्यु भएको हो । सो घटनामा ६ जना घाइते भएका हुन् । घाइतेमध्ये ४ जनाको मणिपाल शिक्षण अस्पतालमा उपचारार्थ लगिएको छ भने बाँकी २ जना सामान्य घाइतेलाई उद्धार गरी अस्पताल लगिँदै छ । 

जिल्ला प्रहरी कार्यालय कास्कीका प्रवक्ता प्रहरी नायव उपरीक्षक सुवास हमालका अनुसार पहिरोमा परी ज्यान गुमाएकाहरुको पहिचान खुल्न बाँकी छ ।   

घरमाथिको सडक भत्किँदै आएको पहिरोले टंकबहादुरको घर बगाएको हो । पहिरोपछि स्थानीय र प्रहरीको सक्रियतामा घाइतेहरूलाई अस्पताल पु¥याएको छ । 

गएराति उनको घरमा बर्थ डे मनाउन छिमेकी तथा इष्‍टमित्र समेत आएकोले थप मानिस पनि पहिरोमा परेका हुन सक्ने प्रहरीको अनुमान छ । अन्य हराइरहेको आशंकामा प्रहरीले खोजीकार्य जारी राखेको छ ।

त्यसैगरी, पोखरा महानगरपालिका वडा २५, हेम्जामा पनि पहिरोमा परी एक वृद्धाले ज्यान गुमाएकी छन् । गएराति साढे २ बजेतिर घर पछाडिबाट पहिरो आउँदा ७० वर्षीया हिमकला अधिकारीको मृत्यु भएको प्रहरीले जनायो ।

पहिरोले पोखराको छोरेपाटनमा ३ जना घाइते

पोखराको छोरेपाटनस्थित सिमलटुँडामा पहिरोमा परी ३ जना घाइते भएका छन् । 

स्थानीय चन्द्रबहादुर मगरको घरमाथिबाट खसेको पहिरोमा परी उनीसहित श्रीमती शान्ति र छोरा सुशान मगर सामान्य घाइते भएका छन्।

घाइतेहरुको उपचारार्थ पोखरा बिरौटास्थित नमस्ते अस्पताल लगिएको जिल्ला प्रहरी कार्यालय कास्कीका प्रवक्ता प्रहरी नायव उपरीक्षक सुवास हमालले जानकारी दिए।

अविरल वर्षासँगै पोखरामासेती नदीको बहाव बढ्दा रामघाटस्थित सुकुम्वासी बस्ती डुबानमा पर्ने खतरा रहेकोले गएराति माइकिङ गरी अन्यत्र सुरक्षितस्थान सारिएको छ ।