कश्मीरमा लगाइयो कर्फ्यु : विरोधकर्ताहरूले भोलि कालो दिन मनाउने

भारतप्रशासित कश्मीरमा बुधवार अगस्ट ५ मा विरोध प्रदर्शन हुन सक्ने आशंकामा कर्फ्यु लगाइएको छ । 

पोहोर साल अगस्ट ५ मा भारतको केन्द्र सरकारले कश्मीरको विशेष दर्जा खोसेको थियो । 


Advertisement

यस दिनलाई कालो दिवसका रूपमा मनाउने योजना विभिन्न समूहले बनाइरहेको र त्यसमा हिंसा हुन सक्ने भन्दै कर्फ्यु लगाइएको अधिकारीहरूको भनाइ छ । 

कोभिड–१९ का कारण पनि भीडभाड गर्न नदिइएको उनीहरूले बताए । 


Advertisement

पोहोर साल जम्मु–कश्मीरलाई दुईवटा केन्द्रशासित प्रदेश बनाइएको थियो र त्यसको अर्धस्वायत्त हैसियत खोसिएको थियो । 

त्यसको एक वर्ष पुगेको पूर्वसन्ध्यामा उक्त क्षेत्रमा तनाव रहेको र थप सैनिकहरू तैनाथ गरिएको बताइएको छ । 

संविधानको धारा ३७० खारेज गर्ने निर्णयलाई कश्मीरमा आक्रोश र धोकेबाजीका रूपमा लिइएको थियो भने भारतका अन्य स्थानमा त्यसको स्वागत गरिएको थियो । त्यसपछि लगाइएको कर्फ्यु र सञ्चार सम्पर्क विच्छेदपछि ​हजारौंलाई पक्राउ गरिएको थियो । 
 

कश्मीरमा विभिन्न विरोध प्रदर्शन भइरहेका हुन्छन् र सुरक्षा फौजहरू नागरिकसँग भिड्ने गरेका छन् । 

जम्मु–कश्मीर भारतको एक मात्र मुस्लिमबहुल राज्य थियो र त्यहाँ दशकौंदेखि भारतविरोधी प्रदर्शन हुने गरेका थिए । 

यो संसारको सबभन्दा खतरनाक स्थानमध्ये एक हो र यहाँ सेनाको भारी तैनाथी गरिएको छ । 
 

कश्मीरमा भारत र पाकिस्तान दुवैले दाबी गरेका छन् र दुईवटा युद्ध यसैका लागि लडिसकेका छन् । 

बीबीसीबाट

एजेन्सी
एजेन्सी

लेखकबाट थप...

कमेन्ट गर्नुहोस्