पार्टीभित्र देखिएको विवाद समाधानको प्रयास स्वरूप प्रधानमन्त्री एवं नेकपा अध्यक्ष केपी शर्मा ओलीले विवाद समाधानका लागि गठित कार्यदलका सदस्यसँग सोमवार परामर्श गर्ने भएका छन् ।

ओलीले बोलाएको बैठकमा पूर्व माओवादी समूहका नेताहरू भने सहभागी नहुने बुझिएको छ । 

पार्टीभित्रको विवाद उत्कर्षमा पुगेको बेला नेकपा सचिवालय बैठकले गत साउन ३० गते महासचिव विष्णु पौडेलको संयोजकत्वमा ६ सदस्यीय कार्यदल गठन गरेको थियो । कार्यदलमा ओली पक्षबाट महासचिव पौडेल र लुम्बिनी प्रदेशका मुख्यमन्त्री एवं नेकपा स्थायी कमिटी सदस्य शंकर पोखरेल थिए । 

कार्यकारी अध्यक्ष पुष्पकमल दाहाल ‘प्रचण्ड’ पक्षबाट स्थायी कमिटी सदस्य जनार्दन शर्मा र पम्फा भुसाल तथा माधव नेपाल पक्षबाट भीम रावल र सुरेन्द्र पाण्डे सदस्य थिए । कार्यदलले दिएको सुझाव भदौ २६ गते बसेको स्थायी कमिटी बैठकले अनुमोदन गर्दै विवाद समाधान भएको थियो । 

महासचिव पौडेलमार्फत प्रधानमन्त्री ओलीले कार्यदलका सदस्यलाई दिउँसो १२ बजे बालुवाटारमा बोलाएका कार्यदलका एक सदस्यले जानकारी दिए । ओलीले बोलाएको बैठकमा पूर्व माओवादी पक्षमा नेताहरू भने नजाने सम्भावना छ । ‘जनार्दन शर्मा बिरामी रहेका र भुसाल अन्य काममा व्यस्त भएकाले बैठकमा सहभागी हुने सम्भावना न्युन छ,’ पूर्व माओवादी स्रोतले लोकान्तरसँग भन्यो । 

पार्टीभित्र देखिएको विवाद समाधानका लागि कार्यकारी अध्यक्ष प्रचण्ड लगायत सचिवालयका ५ जना सदस्यले ४८ घण्टाभित्र सचिवालय बैठक बोलाउन दिएको अल्टिमेटम सोमवार सकिँदैछ । प्रधानमन्त्री ओलीले आइतवार माधव नेपाल समूहसँग परामर्श गरेका थिए । 

नेता नेपालले कार्यदलले दिएको प्रतिवेदन र स्थायी कमिटीको निर्णय कार्यान्वयनका लागि तत्काल सचिवालय बैठक बोलाउन सुझाव दिएका थिए ।